Senat tóraǵasy elde jańa partııalardyń qurylýyna qatysty pikir aıtty

Onyń aıtýynsha, jańa Konstıtýtsııa partııalyq júıeni damýyna úlken septigin tıgizedi. Óıtkeni, bir palataly Parlament – Quryltaı partııalyq tizimder arqyly qalyptasady. Jalpy, partııalyq júıeni kúsheıtý kerek.

- Elimizde zańnama aıasynda partııalar qurýǵa múmkindik bar. Meniń oıymsha, aldaǵy ýaqytta jańa Konstıtýtsııanyń qabyldanýy jańa partııalardyń damýyna úlken septigin tıigizedi, - dedi Máýlen Áshimbaev Senattyń jalpy otyrysynan keıin.

Sonymen qatar ol elde jańa partııanyń qurylýyna qatysty keshe ǵana jarııalanǵan málimdeme boıynsha pikir aıtty.

- Jalpy, el azamattary qoǵamdyq uıymdardy, saıası partııalardy qurýǵa erikti. Eń bastysy, tıisti is-qımyldardy memlekettiń zańnamasyna saı júzege asyrý kerek... Osy oraıda partııalyq básekelestiktiń damýy, jańa partııalardyń paıda bolýy, osyǵan deıin qurylǵan partııalardyń belsendigi Qazaqstannyń ary qaraı qarqyndy damýyna yqpal etedi. Sondyqtan eldiń damýy úshin bizde qýatty saıası partııalardyń bolýy mańyzdy, - dedi Senat tóraǵasy.

Bul turǵyda ol jańa partııalardyń qurylýyna ońtaıly qaraıtynyn atap ótti.

Aıta keteıik, jaqynda bastamashyl top «Ádilet» atty jańa saıası partııanyń qurylatynyn málimdedi.