Senat tóraǵasy ekojúıeni damytýdaǵy problemany atady
ASTANA. KAZINFORM — Memlekettik organdar Bıoártúrlilikti saqtaý tujyrymdamasyn ázirlep jatyr. Bul týraly ekojúıelerdi utymdy paıdalaný taqyrybyndaǵy ornyqty damýy salasyndaǵy mindetterdiń iske asyrylýyn monıtorıngileý jónindegi Parlamenttik komıssııanyń otyrysynda Senat tóraǵasy Máýlen Áshimbaev málim etti.
- Parlamenttik komıssııanyń búgingi otyrysy bıoártúrlilikti saqtaý jáne qurlyqtyń ekojúıesin tıimdi paıdalaný máselelerine arnalyp otyr. Jalpy, qazirgi tańda qorshaǵan ortany qorǵaý jáne ekojúıeni damytý búkil álem úshin ózekti másele ekeni belgili. Elimizde de bul baǵytta atqarylýǵa tıis kóptegen mańyzdy mindetter bar. Sondyqtan Prezıdentimiz Qasym-Jomart Kemeluly Toqaev osy salaǵa únemi basa mán berip keledi. Búginde Memleket basshysynyń tapsyrmasymen júıeli jumystar iske asyrylyp jatyr. Sonyń aıasynda Senat depýtattary orman sharýashylyǵy men erekshe qorǵalatyn tabıǵı aýmaqtardy, topyraqty qorǵaý salasyn retteıtin zań jobalaryna bastamashy boldy. Sondaı-aq, tıisti memlekettik organdar Bıoártúrlilikti saqtaý tujyrymdamasyn ázirleýde. Búgingi otyrysta jaýapty mınıstrlikterdiń basshylary atqarylyp jatqan is-sharalar men aldaǵy jumystar boıynsha sóz sóıleıdi. Osy baǵyttarǵa qatysty sarapshylar men halyqaralyq uıymdardyń ókilderi de óz oılaryn ortaǵa salady dep oılaımyz, - dedi M. Áshimbaev.
Onyń aıtýynsha, 2024 jylǵy ornyqty damý ındeksine sáıkes, jerdegi ekojúıelerdi saqtaý bizdiń el úshin eń problemaly alty baǵyttyń biri sanalady. Osyǵan oraı, búgingi otyrysta eń aldymen orman resýrstaryn basqarýǵa, jerdiń tozýyna jol bermeý jáne sırek kezdesetin janýarlardyń sanyn kóbeıtý máselelerine arnalmaq.
- Qazaqstanda aýmaqtyń 5 paıyzynda ǵana orman alqaptary bar. Jaǵdaıdy antropogendik áser ýshyqtyrdy, ıaǵnı ormandardy kesý, orman órtteri, orman resýrstaryn qalpyna keltirý boıynsha jetkiliksiz jumys keri áser etedi. Taǵy bir ózekti másele topyraqtyń tozýyna baılanysty. Elimizde aýmaqtyń úshten bir bóligi nemese 90 mln gektardan astam jer erozııaǵa ushyraǵan. Bul másele aýyl sharýashylyǵy úshin eń ótkir máselelerdiń biri sanalady, - dedi Senat tóraǵasy.
Mamandardyń baǵalaýyna qaraǵanda, buǵan jel men sý erozııasy, júıesiz túrde mal baǵý, egin sharýashylyǵy tehnologııasynyń saqtalmaýy, aýyl sharýashylyǵy jerleriniń paıdalanylýyna baqylaýdyń jetkiliksizdigi sebep boldy.
- Elimizdiń aldynda turǵan taǵy bir mańyzdy mindet – sırek kezdesetin janýarlardy saqtaý jáne olardyń sanyn kóbeıtý. Bul rette belgili bir jetistikter bar. Oǵan mysal retinde elimizde qar barystarynyń kóbeıýin keltirýge bolady, - dedi Máýlen Áshimbaev.
Budan buryn habarlanǵandaı, bıyl Parlament Májilisiniń qaraýyna «Topyraqty qorǵaý týraly» zań jobasy men ilespe qujat engizildi.