Senat tóraǵasy ekologııalyq jaýapkershiligi tómen kompanııalardy synǵa aldy
ASTANA. KAZINFORM – Jekelegen kásiporyndardyń áreketteriniń nátıjesinde ekologııalyq jaǵymsyz saldarlardy kórip otyrmyz. Bul týraly Qazaqstannyń ornyqty damýy salasyndaǵy ulttyq maqsattar men mindetterdiń iske asyrylýyn monıtorıngileý jónindegi Parlamenttik komıssııa otyrysynda Senat tóraǵasy Máýlen Áshimbaev málim etti.
«Elimizde jumys isteıtin keıbir kompanııalardyń ekologııalyq jaýapkershiliginiń óte tómen degeıi qatty alańdatyp otyr. Jekelegen kásiporyndardyń áreketteriniń nátıjesinde ekologııalyq jaǵymsyz saldarlardy kórip otyrmyz», - dedi M. Áshimbaev.
Onyń aıtýynsha, ónerkásiptik kásiporyndardyń qorshaǵan ortaǵa tıgizetin keri áserin azaıtýǵa baǵyttalǵan salyq jáne tabıǵatty qorǵaý zańnamasynyń normalary qanshalyqty tıimdi júzege asyrylyp jatyr degen suraqtar týyndap otyr.
Sonymen qatar Senat tóraǵasy áleýmettik prıntsıpterdi saqtaýda bızneste áli de deklaratıvti áreketter bar ekenin aıtty.
«Bul rette, Qazaqstanda jalaqynyń jalpy ishki ónimdegi úlesi nebári 30 paıyzǵa jýyq. EYDU elderinde bul kórsetkish 60% jáne odan da joǵary. Jalpy halyqaralyq tájirıbede onyń úlesi kem degende 50% bolýy kerek dep sanalady. Elde eńbekaqy tóleýde genderlik alshaqtyq máselesi de ózekti, ıaǵnı erler áıelderge qaraǵanda orta eseppen 26,5 paıyzǵa kóp joǵary jalaqy alady, al keıbir aımaqtarda bul alshaqtyq eki esege jetedi. Tutastaı alǵanda, kompanııa deńgeıindegi ornyqty damýdy basqarý máselesinde áli de jaǵdaıdy túzetý kerek. ESG prıntsıpterin ıntegratsııalaý boıynsha jetekshi kompanııalardyń jartysynda bul salaǵa jaýaptylar bekitilmegen», - dedi M. Áshimbaev.
Budan buryn habarlanǵandaı, Senat tóraǵasy Máýlen Áshimbaev qazir álemde ESG qaǵıdalaryn engizý turaqty bıznes qalyptastyrýǵa, ony básekege qabilettigin arttyrýǵa jáne uzaq merzimdi qundylyqtardy dáripteýge yqpal etetinin aıtty.
