Senat tóraǵasy bıznesti qoldaýǵa arnalǵan baǵdarlamalardy júıeleýdi usyndy
ASTANA. KAZINFORM — Bıznesti memlekettik qoldaý ashyq, ádil bolýǵa tıis. Barlyq rásim júıeli túrde júrgizilýi kerek. Bul jóninde Senat otyrysynda Palata tóraǵasy Máýlen Áshimbaev aıtty.
- Bıznesti memlekettik qoldaý máselesin keńirek alyp qaraıtyn bolsaq, búginde bıznes memleket qarjysynyń tóńireginde shoǵyrlanǵanyn baıqaımyz. Áıteýir, tender, off-take, sýbsıdııa, kepildik, jeńildetilgen nesıe, paıyzdyq mólsherlemeni sýbsıdııalaý sııaqty qoldaý tetikterin paıdalanady. Osy jumysty júıeleý úshin Memlekettik qoldaý sharalarynyń biryńǵaı tizilimi quryldy. Baqylauda aqparattyq júıesi de jumys istep tur. Alaıda memlekettik qoldaý tek respýblıkalyq bıýdjet arqyly ǵana emes, «Báıterek» holdıngi, áleýmettik-kásipkerlik korporatsııalar arqyly da júzege asyrylyp jatyr. Ekinshi deńgeıli bankter de paıyzdyq mólsherlemelerdi sýbsıdııalaý tetikterine qatysady. «Báıterek» holdınginiń quramynda «Damý» qory, Ónerkásipti damytý qory, Damý banki, Agrarlyq nesıe korporatsııasy jáne basqa da kóptegen uıymdar bar. Óńirlik jáne ortalyq deńgeıde, bıýdjet, Ulttyq qor jáne damý ınstıtýttary arqyly bıznesti qoldaýmen aınalysatyn mundaı sýbektiler az emes. Osyndaı jaǵdaıda belgili bir deńgeıde fýnktsııalardyń qaıtalanýy, artyq ákimshilik shyǵyndar, tıimsizdik jáne tipti sybaılas jemqorlyq táýekelderi de bolýy múmkin ekeni túsinikti, – dedi Máýlen Áshimbaev.
Sondaı-aq Senat tóraǵasy Memlekettik qoldaý sharalarynyń biryńǵaı tizilimimen qatar, bıznesti qoldaý rásimderin tolyq júıeleýge múmkindik beretin «bir tereze» qaǵıdatyn engizý jáne jasandy ıntellektini paıdalaný asa ózekti ekenin aıtty.
- Biryńǵaı tizilimnen bólek, sizderde «bir tereze» júıesin qurý týraly bastama bolǵan edi. Qazir osy ıdeıany belsendi túrde iske asyrý qajet dep oılaımyn. Joba nemese kompanııa týraly negizgi málimetter bir jerge engizilip, barlyq aqparattyq baza ózara ıntegratsııalanýy kerek. Sonda jasandy ıntellektiniń kómegimen qaı kompanııa qandaı qoldaýǵa laıyq nemese laıyq emes ekenin anyqtaýǵa bolady. Budan keıin barlyq protsess ashyq túrde baqylaýǵa alynady. Osylaısha, biz artyq ákimshilik shyǵyndardy qysqartyp, sybaılas jemqorlyq táýekelderin tómendeter edik. Memleket qarajatynyń tıimsiz jumsalýyna jol bermeı, qaıtalanatyn fýnktsııalardy azaıtyp, qoldaýdy qajet etpeıtin kompanııalarǵa negizsiz kómek kórsetýdi de toqtatar edik. Menińshe, bul – memlekettik qoldaý júıesin retke keltirýdiń áldeqaıda tıimdi joly. Byltyrdyń ózinde mundaı qoldaý kólemi birneshe trıllıon teńgeni quraǵany belgili. Al oǵan jergilikti bıýdjetterdiń qarajatyn qossaq, ne bolady?», – dedi M. Áshimbaev.
Aıta keteıik, búgin Senattyń jalpy otyrysynda Úkimet pen Joǵary aýdıtorlyq palatanyń 2025 jylǵy respýblıkalyq bıýdjettiń atqarylýy týraly esepteri tyńdaldy.
