Senat tóraǵasy: áskerde múgedek bolyp qalatyndaı aýyr jaraqat alý – tótenshe jaǵdaı

ASTANA. KAZINFORM – Búgin Senattyń jalpy otyrysynda rezervtegi áskerı qyzmet týraly zańdy qaraý barysynda palata tóraǵasy Máýlen Áshimbaev Qazaqstan armııasyndaǵy rezervtegilerdiń quqyqtaryna jáne olardy áleýmettik qorǵaý máselelerine nazar aýdardy.

Сенат төрағасы: әскерде мүгедек болып қалатындай ауыр жарақат алу – төтенше жағдай
Фото: senate.parlam.kz

Eńbek jáne halyqty áleýmettik qorǵaý birinshi vıtse-mınıstri Aqmádı Sarbasovtyń sózine qaraǵanda, eger rezervtik áskerı qyzmettegiler jattyǵýlar kezinde jaraqat alyp, tipti múgedek bolyp qalsa, olarǵa ótemaqy memleketimizde bar normalar boıynsha tólenedi. Al, áskerı qyzmetshiler, ofıtserler osyndaı jaǵdaıǵa tap bolsa, olarǵa tólenetin tólemaqy basqa júıemen júrgiziledi.

Senat Tóraǵasy osy máselege basa mán berip, bul baǵytty áli de pysyqtaý qajet ekenin aıtty.

– Eger rezervıster áskerı jattyǵýlar, ıaǵnı 60 kúnniń nemese aı saıyn baratyn eki-úsh kúnniń ishinde jaraqat alsa, olarǵa ótemaqylar nege áskerı qyzmetshilerge tólenetin tólem deńgeıimen berilmeıdi? Olar óz úıinde emes, jumysynda emes, sol áskerı jattyǵýlar kezinde jaraqat alsa, logıka qaıda?! Sondyqtan osy máseleni taǵy da pysyqtaý kerek. Zań qabyldanyp, ári qaraı iske asyryla bastaǵanda, bolǵan jaǵdaılardyń bárin nazarǵa alyp, muqııat zerdeleý qajet. Árıne, ofıtserler ondaı jaǵdaılarǵa jetkizbeýge tıis. Soǵan senemiz. Óıtkeni áskerde múgedek bolyp qalatyndaı aýyr jaraqat alý – naǵyz tótenshe jaǵdaı. Degenmen ómir bolǵan soń ártúrli jaǵdaı bolýy múmkin. Sol sebepti bárin eskerýimiz kerek. Óıtkeni bul – áleýmettik mańyzy zor másele, - dedi Máýlen Áshimbaev.

Aıta keteıik, búgin Senat otyrysynda Palata depýtattary «Qazaqstan Respýblıkasynyń keıbir zańnamalyq aktilerine rezervtegi áskerı qyzmet jáne jekelegen ortalyq memlekettik organdardyń fýnktsııalaryn qaıta bólý máseleleri boıynsha ózgerister men tolyqtyrýlar engizý týraly» zańdy eki oqylymda qarap maquldady. 

Zań Qarýly Kúshterdi, basqa da áskerler men áskerı quralymdardy rezervtik kúshtermen qamtamasyz etý úshin quqyqtyq negiz qalyptastyrýdy kózdeıdi.

Сейчас читают