Senat tóraǵasy Aqtóbe oblysynyń jastarymen kezdesýde «Adal azamat» tujyrymdamasynyń mańyzy týraly aıtty
ASTANA. KAZINFORM — Senat tóraǵasy Máýlen Áshimbaev Aqtóbe oblysynyń jurtshylyǵymen, máslıhat depýtattarymen, Qazaqstan halqy Assambleıasynyń múshelerimen jáne daryndy jastarymen kezdesti.
Palata spıkeri atap ótkendeı, óńirlerdi nátıjeli damytyp, azamattardyń ál-aýqatyn arttyrý úshin el Prezıdentiniń bastamasymen qolǵa alynǵan reformalardy sapaly iske asyrý jáne sol jolda kúsh jumyldyrý asa mańyzdy. Osyǵan baılanysty ol zańnamalyq saladaǵy birlesken jumystyń negizgi baǵyttaryna toqtaldy.
— Prezıdentimiz Qasym-Jomart Kemeluly Toqaevtyń bastamasymen elimizde keshendi reformalar iske asyrylyp jatyr. Sonyń ishinde ekonomıkany ártaraptandyrýǵa, óńdeý ónerkásibi men aýyl sharýashylyǵyn damytýǵa úlken kóńil bólinýde. Ulttyq quryltaıdyń IV otyrysynda elimizdiń áleýmettik-ekonomıkalyq jáne saıası baǵdaryna qatysty basymdyqtar aıqyndaldy. Munyń bári — Ádiletti, Qaýipsiz, Taza, Qýatty Qazaqstan qurý úshin qolǵa alynǵan keshendi bastamalar. Memleket basshysy belgilep bergen osy mindetterdi iske asyrý jolynda senatorlar men máslıhat depýtattarynyń júıeli ózara is-qımyly men birlesken jumysyn ári qaraı jalǵastyrýdyń mańyzy zor, — degen Senat tóraǵasy aımaqtyń ósip-órkendeýine jol ashatyn jańa óndiris oryndaryn damytý jáne óńirge ınvestıtsııa tartý máselelerine nazar aýdardy.
Sondaı-aq is-shara barysynda Qazaqstan halqy Assambleıasynyń HHHІV sessııasynda Memleket basshysy júktegen etnosaralyq qatynastardy nyǵaıtý jónindegi mindetter men Álemdik jáne dástúrli dinder kóshbasshylarynyń VIII sezine daıyndyq aıasynda rýhanı dıplomatııany ilgeriletý tetikteri sóz boldy. Óńirdiń kreatıvti jastarymen kezdesýde bilimdi jas býynnyń eldi jańǵyrtý úderisindegi róline basa mán berildi.
— Qazaqstan ádilettilik ústemdik quratyn zamanaýı ári qýatty memleketke aınalýy kerek. Bul maqsatqa jastardyń qatysýynsyz qol jetkizý múmkin emes. Sebebi, damý úshin tyń ıdeıalar men jańa kózqaras kerek. Sondyqtan jas býynnyń boıyna ózin ózi damytý, úzdiksiz bilim alý, taldaý jasaý, emotsıonaldyq ıntellekti shyńdaý sııaqty qabiletterdi darytý qajet. Bul rette durys qundylyqtarǵa jáne Prezıdentimiz Qasym-Jomart Kemeluly Toqaev jarııalaǵan «Adal azamat» tujyrymyna taban tireý aıryqsha mánge ıe, — dedi Máýlen Áshimbaev.
Sonymen qatar senatorlar birqatar áleýmettik nysandarǵa bardy jáne kásiporyndardyń eńbek ujymdarymen kezdesti.
Aıta ketelik Aqtóbe oblystyq jastar saıasaty máseleleri basqarmasyna jańa basshy taǵaıyndalǵan edi.