Senat tóraǵalyǵyna jańa kandıdatty usyný tikeleı Memleket basshysynyń quziretinde - Q.Toqaev
ANA. 17 naýryz. QazAqparat /Qanat Mámetqazyuly/ - QR Parlamenti Senatynyń tóraǵalyǵyna jańa kandıdatty usyný tikeleı Memleket basshysynyń quziretinde.
Búgin QR Parlamenti Senatynyń otyrysynan keıin jýrnalısterge bergen suhbatynda palata spıkeri Qasym-Jomart Toqaev osylaı málimdedi.
«Maǵan Senat tóraǵasy retinde ornyma kimniń keletini áli belgisiz. Óıtkeni, bul - tikeleı Memleket basshysynyń quziretine jatady. Konstıtýtsııaǵa sáıkes QR Prezıdenti senatorlardyń aldyna joǵary Palatanyń spıkerligine kandıdatty saılaý úshin usynatyn bolady»,-dedi Q. Toqaev.
Aıta keteıik, Qasym-Jomart Toqaev BUU-nyń Jenevadaǵy bóliminiń bas dırektory bolyp taǵaıyndaldy. Bundaı ýaǵdalastyqqa QR Prezıdenti Nursultan Nazarbaev pen BUU Bas hatshysy Pan Gı Mýn telefon arqyly sóılesý kezinde qol jetkizdi. «...Pan Gı Mýn sondaı-aq, BUU júıesindegi basshylyq qyzmetke Qasym-Jomart Toqaevty usyný týraly Qazaqstan Prezıdentiniń usynysyn egjeı-tegjeıli zerttegenin jetkizdi. Jáne halyqaralyq qaýipsizdikti jáne ıadrolyq qarý-jaraqty taratpaý rejımin nyǵaıtýǵa qosqan Qazaqstannyń aıtýly úlesin, eldiń áleýmettik-ekonomıkalyq damýdaǵy jáne syrtqy saıasattaǵy jetistikterin eskere otyryp, Qasym-Jomart Toqaevty BUU-nyń Jenevadaǵy bóliminiń Bas dırektory etip taǵaıyndaý týraly sheshim qabyldaǵanyn aıtty», - delingen QR Prezıdenti baspasóz qyzmetiniń 12 naýryzda taratqan habarlamasynda.
Al búgin QR Parlamenti Senatynyń otyrysynan keıin jýrnalısterge bergen suhbatynda palata spıkeri Qasym-Jomart Toqaev BUU júıesindegi mańyzdy laýazymǵa taǵaıyndalýy Elbasynyń halyqaralyq bedeliniń arqasynda júzege asqanyn atap kórsetti. «Eń aldymen, bul - Memleket basshysynyń, bizdiń Prezıdentimizdiń halyqaralyq arenadaǵy zor bedeliniń nátıjesi", - dedi ol.
Sonymen qatar Q. Toqaev Jenevadaǵy jańa qyzmetine sáýir aıynyń ortasynan kirisetinin jekizdi." Sáýir aıynyń ortasynda Nıý-Iorkte BUU Bas hatshysy Pan Gı Mýnmen kezdesýim josparlan. Sol kezdesý barysynda maǵan naqty tapsyrmalar júkteledi dep kútemin»,-dedi Q. Toqaev.
Sondaı-aq Q. Toqaev halyqaralyq deńgeıdegi jańa laýazym ózine kúrdeli ári jaýapty mindet júkteıtinin aıtty. «BUU júıesindegi jańa qyzmetimdegi basymdyq negizinen qarýsyzdandyrý máselesine baılanysty bolyp tabylady. Negizinen Jenevada birqatar halyqaralyq uıymdar shoǵyrlanǵan ári osy jerde qarýsyzdandyrý máselesi boıynsha konferentsııa jumys isteıdi. Men osy konferentsııanyń Bas hatshysy bolamyn. Qarýsyzdaný - óte kúrdeli jumys. Óıtkeni ótken 9 jyl boıy osy konferentsııa jumysy eshqandaı naqty nátıje bergen joq. Sol úshin bul maǵan júktelgen óte kúrdeli ári jaýapty mindet»,-dedi Q. Toqaev.
