Senat TMD elderimen birlese jemqorlyqpen kúres jónindegi qujatty maquldady
ASTANA. KAZINFORM – Búgin Senattyń jalpy otyrysynda «Táýelsiz Memleketter Dostastyǵyna qatysýshy memleketterdiń sybaılas jemqorlyqqa qarsy is-qımyldaǵy yntymaqtastyǵy týraly kelisimdi ratıfıkatsııalaý týraly» Zańy maquldandy.
Bul kelisimge 2022 jylǵy 14 qazanda Astana qalasynda Armenııa, Belarýs, Ózbekstan, Qyrǵyzstan, Reseı, Tájikstan jáne Qazaqstan basshylary qol qoıdy. Qujat mynadaı baǵyttar boıynsha yntymaqtastyqty qamtıdy: sybaılas jemqorlyq qylmystary men quqyq buzý derekteri týraly ister boıynsha járdem kórsetý, birlesken jedel-izdestirý is-sharalaryn júrgizý, sybaılas jemqorlyq qylmystaryn jasaǵan adamdardy ustaý ári berý, sybaılas jemqorlyqtan túsken kiristerdi izdestirýdi jáne qaıtarýdy júzege asyrý, arnaıy aqparattyq júıelerdi qurý men paıdalaný.
- Kelisim aıasynda basqa da yntymaqtastyq sharalary qarastyrylǵan, ıaǵnı kadrlardyń biliktiligin arttyrý, sybaılas jemqorlyqqa qarsy is-qımyl salasyndaǵy quqyqtyq retteý tájirıbesimen, sybaılas jemqorlyqqa qarsy monıtorıng nátıjelerimen almasý, sybaılas jemqorlyqqa qarsy is-qımyl máseleleri boıynsha yntymaqtastyq baǵdarlamalary men josparlaryn ázirleý. Sonymen qatar, qujatta onyń erejelerin iske asyratyn quziretti organdardy aıqyndaý tártibi, olardyń ókilettikteri, basqa taraptarmen ózara is-qımyl jasaý tásilderi, járdem kórsetý týraly suraý salý, ony oryndaý tártipteri, oryndaýdan bas tartý negizderi, sondaı-aq, sybaılas jemqorlyqtan túsken kiristerdi tárkileý sharalary qarastyrylǵan, - dedi senator Qaırat Tastekeev.
Onyń aıtýynsha, kelisimde Qazaqstan zańnamasynan erekshelenetin erejeler bar. Osyǵan baılanysty, Qazaqstan jaǵy kelisimge mynadaı eskertpemen qol qoıdy: «Qazaqstan Respýblıkasy óziniń zańnamasyna qaıshy kelmeıtin bóliginde osy Kelisimniń 10-baby a) tarmaqshasynyń, 12-babynyń jáne 14-babynyń erejelerin qoldaný quqyǵyn ózine qaldyrady dep málimdeıdi».
- Qazaqstandaǵy avtomattandyrylǵan aqparattyq, anyqtamalyq júıeler men derekter bankterinen aqparatty quzyretti organ retinde - Sybaılas jemqorlyqqa qarsy agenttik ulttyq zańnamanyń talaptaryna qatań sáıkes túrde, atap aıtqanda, qozǵalǵan qylmystyq ister sheńberinde jáne banktik, salyq salasyndaǵy, kommertsııalyq qupııalardy saqtaı otyryp alatyn bolady. Sondaı-aq, Qazaqstan óz ulttyq zańnamasynda kelisimdegi tizbeden ózgeshe sybaılas jemqorlyq qylmystarynyń tizbesin qarastyrýǵa quqyly, - dep túsindirdi depýtat.
Kelisimdi ratıfıkatsııalaýdan kútiletin oń quqyqtyq nátıjelerdiń biri - sybaılas jemqorlyqtan túsken kiristerdi izdestirýdi jáne qaıtarýdy júzege asyrýdaǵy ózara is-qımyldyń tıimdi áreket etýin qamtamasyz etý.
Buǵan deıin Parlament Májilisi sybaılas jemqorlyqqa qarsy is-qımyl jónindegi qujatty qabyldaǵanyn jazǵan edik.