Senat TMD elderiniń mınadan tazartýdaǵy birlesken bólimshesine qatysty zańdy qabyldady

NUR-SULTAN. QazAqparat – Senattyń jalpy otyrysynda «Táýelsiz Memleketter Dostastyǵyna qatysýshy memleketter qarýly kúshteriniń birlesken gýmanıtarlyq mınasyzdandyrý ınjenerlik bólimshesi týraly kelisimdi ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Táýelsiz Memleketter Dostastyǵyna qatysýshy memleketter qarýly kúshteriniń birlesken gýmanıtarlyq mınasyzdandyrý ınjenerlik bólimshesi týraly kelisim 2020 jylǵy 18 jeltoqsanda jasaldy.

«Kelisimniń maqsaty – gýmanıtarlyq mınasyzdandyrý mindetin oryndaý úshin birlesken bólimsheni qurý, qoldaný, onyń mártebesin aıqyndaý. Birlesken bólimsheniń negizgi mindetteri – mına alańyn, nysandardy mınanyń jarylý qaýpi bar zattardyń bolýyna tehnıkalyq barlaý, sondaı-aq olardy mınasyzdandyrý, jaýyngerlik is-qımyl bolǵan aýdandy mınadan ári jarylý qaýpi bar zattan tazartý», - dedi QR Qorǵanys mınıstriniń orynbasary Daryn Tuıaqov.

Onyń aıtýynsha, gýmanıtarlyq mınasyzdandyrý operatsııalaryna qatysý úshin ulttyq ınjenerlik bólimsheni jiberý týraly sheshimdi jiberýshi tarap óziniń ulttyq zańnamasyna sáıkes qabyldaıdy.

Kelisimde Birlesken bólimsheni TMD-ǵa qatysýshy memleket bolyp sanalmaıtyn el aýmaǵynda gýmanıtarlyq mınasyzdandyrý mindetterin oryndaýǵa tartý múmkindigi kózdelgen. Qazaqstan Respýblıkasy mundaı baǵyt BUU Qaýipsizdik Keńesiniń mandatyna sáıkes ǵana múmkin bolady dep esepteıdi.