Senat TMD-daǵy aqparattyq qaýipsizdik týraly zań jobasyn qaraıdy
ASTANA. QazAqparat - Senattyń Halyqaralyq qatynastar, qorǵanys jáne qaýipsizdik komıtetiniń otyrysynda «TMD-ǵa qatysýshy memleketterdiń aqparattyq qaýipsizdikti qamtamasyz etý salasyndaǵy yntymaqtastyǵy týraly kelisimdi ratıfıkatsııalaý týraly» zań jobasy talqylandy, dep habarlaıdy QazAqparat.
«Zań jobasyn qabyldaý TMD-ǵa qatysýshy memleketterde aqparattyq qaýipsizdikti qamtamasyz etýge baǵyttalǵan birlese úılestirilgen sharalardy ótkizýge múmkindik beredi. Kelisimdi ratıfıkatsııalaý tıisti baǵyttar boıynsha ózara is-qımyl men yntymaqtastyqty júzege asyrýǵa múmkindik beredi. Aqparatty transshekarylyq berýdi uıymdastyrý, áleýetti ári naqty qaýipterden aqparattyq júıeler men resýrstardy qorǵaý tehnologııasyn jetildirý, aqparatty qorǵaý quraldaryn sertıfıkattaýdyń jáne sertıfıkattaý nátıjelerin ózara tanýdyń kelisilgen tártibin belgileý eskerilgen», - dep toqtaldy QR Qorǵanys jáne aeroǵarysh ónerkásibi vıtse-mınıstri Marat Nurǵojın zań jobasyn tanystyrý barysynda.
Óz kezeginde senator Nurjan Nursıpatov bul kelisimge 2013 jylǵy 20 qarashada TMD elderiniń úkimet basshylarynyń deńgeıinde qol qoıylǵanyn eske saldy.
«Memleket basshysy búkil el ekonomıkasyn tolyqtaı tsıfrlandyrý máselesine qatysty tıisti tapsyrma bergen bolatyn. Sondyqtan bul tapsyrma aqparattyq qaýipsizdikti qamtamasyz etýge tyǵyz baılanysty. Sonymen qatar bul jumystar elimizdiń kıberqaýipsizdigi týraly tujyrymdamasy aıasynda da atqarylyp jatyr. Qarastyrylyp otyrǵan zań jobasy Qazaqstan men dostas memleketter úshin mańyzy óte joǵary. Búgingi kúnge 4 memleket bul zań jobasyn ratıfıkatsııalap qoıǵan, olardyń qatarynda Reseı, Belarýs, Tájikstan men Qyrǵyzstan bar», - dep atap ótti N. Nursıpatov.
Talqylaýdan keıin komıtet zań jobasyn palatanyń jalpy otyrysynyń qaraýyna shyǵarý týraly sheshimdi qabyldady.
