Senat terrorızmge qarsy is-qımyl týraly zań jobasyn birinshi oqylymda maquldady
ASTANA. Jeltoqsannyń 11-i. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «QR keıbir zańnamalyq aktilerine terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady,
dep habarlaıdy QazAqparat.
Atalǵan zań jobasy 2007-2011 jyldarǵa arnalǵan Ulttyq qaýipsizdik strategııasy erejelerin oryndaý maqsatynda ázirlengen. Zań jobasy buryn terrorıstik qylmys jasaǵan adamdarǵa eskirý merzimderin qoldanýǵa tyıym salýǵa, ekstremıstik nemese terrorıstik uıymnyń óz ataýyn ózgertý faktisin sottyń anyqtaý tetigin bekitýge baǵyttalǵan. Sonymen birge qujatta BAQ-tarda terrorızmge qarsy operatsııalardyń tehnıkalyq tásilderi men taktıkasyn ashatyn málimetterdi taratýdy shekteýge, lańkestikke qarsy operatsııanyń quqyqtyq tártibin retteýdi jetildirýge baǵyttalǵan sharalar kózdeledi.
«Ózgertýlerdiń negizgi bóligi áli bolmaǵan terrorıstik qaýipterdiń aldyn alýǵa qatysty bolyp tabylady. Bundaı qaýip-qater álemdik qaýymdastyqty terrorızmge qarsy turýdyń quqyqtyq baǵa berý tásilderi men joldaryn túbegeıli ózgerýge májbúr etti. Qazaqstanda mundaı zań 1999 jyly qabyldanǵan bolatyn. Búgingi kúni Qazaqstan BUU-nyń barlyq ámbebap terrorızmge qarsy konventsııalaryn qabyldady. Halyqaralyq uıymdar sheńberinde birqatar kelisimderge qol qoıyldy. 40-tan astam eldermen ekijaqty ýaǵdalastyqtar jasaldy. Az ǵana jyldar ishinde Ortalyq Azııa men oǵan shektes memleketterdiń qaýipti aımaqqa aınalýy bizdiń el úshin de terrorıstik táýekelderdiń ósine sebep bolyp otyr», dedi zań jobasy boıynsha baıandama jasaǵan Ulttyq qaýipsizdik komıtetiniń tóraǵasy Ádil Shaıahmetov.
Onyń aıtýynsha, qujat terrorızmge qarsy is-qımyl salasyndaǵy respýblıkalyq, halyqaralyq mindettemelerdi iske asyrýǵa, ulttyq zańnamany úılestirýge jáne birizge keltirýge baǵyttalady. Budan basqa, osyndaı qaýipke qarsy turýdyń quqyqtyq negizderin jetildirip, lańkestikpen kúresýdiń tıimdi memlekettik júıesin ońtaılandyrý sharalary kózdeledi. «Zań jobasy terrorızmniń aldyn alýǵa jáne kúresýge, sondaı-aq onyń saldaryn joıý men barynsha azaıtýǵa baǵyttalǵan keshendi quqyqtyq jáne uıymdastyrýshylyq sharalardy qamtyp otyr. Sonymen birge zań jobasyndaǵy ózgeristerge sáıkes terrorızmge qarsy operatsııalardyń quqyqtyq tártibi belgilenedi. Qujat boıynsha Prezıdenttiń jáne Úkimettiń ókilettiligi, terrorızmge qarsy is-qımyldy úılestirý jónindegi ýákiletti organnyń qyzmeti men mindeti anyqtalady», dedi Á. Shaıahmetov.
Birinshi oqylymda maquldanǵan zań jobasy ekinshi oqylymǵa ázirleý úshin Bas komıtetke tapsyrylady.
