Senat terrorızmge qarsy is-qımyl máselelerin qamtyǵan zań jobasyn birinshi oqylymda maquldady
ASTANA. 6 jeltoqsan. QazAqparat - Búgin Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Eske salsaq, atalǵan zań jobasyn Parlament qaraýyna Konstıtýtsııanyń 61-babynyń 1-tarmaǵyna sáıkes zań shyǵarý bastamasymen Memleket basshysy engizgen bolatyn.
Qujat terrorızmge qarsy is-qımyl salasyndaǵy normatıvtik quqyqtyq bazany jetildirýge baǵyttalady. Bul rette zań jobasymen memlekettik organdardy, qoǵamdyq ınstıtýttardy, halyqty tarta otyryp, terrorızmge qarsy is-qımyldaǵy keshendi kózqarasty reglamentteý jáne osy salada, eń aldymen óńirlerde, profılaktıkalyq jumysty kúsheıtý kózdeledi.
Budan bólek, zań jobasymen qoǵamdyq qatynastardyń ártúrli salalarynda memlekettik retteýdi júzege asyratyn birqatar ýákiletti organdardyń quziretine terrorızmge qarsy is-qımyl sheńberinde ózgerister engiziledi.
Sondaı-aq «terrorızmge qarsy is-qımyl» uǵymy onyń úsh negiz quraýshy baǵyty bekitilgen jańa redaktsııada jazylady. Atap aıtqanda, birinshi - terrorızm profılaktıkasy, ıaǵnı qoǵam men memlekettiń barlyq tirshilik salasynda terrorızmdi týyndatatyn jáne terrorızm aktilerin jasaýǵa múmkindik beretin jaǵdaılardy boldyrmaý. Ekinshi - terrorıstik áreketterdi anyqtaý, onyń jolyn kesý, terrorıstik qylmystardy ashý jáne tergeý. Úshinshi - barlyq kúshter men qurylymdardy jumyldyrý jolymen terrorızm saldaryn barynsha azaıtý nemese joıý.
Budan bólek, «terrorızm» uǵymy «kúsh qoldaný ıdeologııasyn» bildiretin jańa qaǵıdattyq mazmunmen tolyqty. Qujat arqyly QR Qarýly Kúshterin terrorızm aktileriniń jolyn kesýge tartý tártibi naqtylanady.
Zań jobasy ekinshi oqylymǵa ázirleý úshin bas komıtetke tapsyryldy.
