Senat tekserýshi memlekettik organnyń quqyǵyna qatysty qujatty Májiliske qaıtardy

ASTANA. KAZINFORM – Búgin Senattyń jalpy otyrysynda  «Qazaqstan Respýblıkasynyń keıbir zańnamalyq aktilerine aqparatqa qol jetkizý, qoǵamdyq qatysý, memlekettik nagradalar jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Zańy eki oqylymda qaraldy. Senat zańnyń jekelegen baptaryn jańa redaktsııada usynyp, ony Májiliske qaıtardy.

Zańdy qabyldaýdaǵy negizgi maqsat – qoǵamnyń talap tilekterin eskere otyryp, memlekettik organdardyń ashyqtyǵyn qamtamasyz etý, memlekettik organdardyń resmı aqparattaryn proaktıvti taratýdy qamtamasyz etý, múgedektigi bar adamdardyń aqparatqa qol jetimdiligin arttyrý.

Zań aıasynda «Ákimshilik rásimdik-protsestik kodeksine», «Halyq densaýlyǵy jáne densaýlyq saqtaý júıesi týraly» kodeksine, «Ekologııalyq kodeksine» jáne «Aqparatqa qol jetkizý týraly», «Quqyqtyq aktiler týraly», «Qazaqstan Respýblıkasyndaǵy til týraly», «Memlekettik nagradalar týraly», «Ruqsattar jáne habarlamalar týraly» qujattarǵa ózgerister men tolyqtyrýlar engizilip jatyr.

- Atap aıtqanda, «Halyq densaýlyǵy jáne densaýlyq saqtaý júıesi týraly» kodeksine ýákiletti organnyń quzyretine ınternet-portalda densaýlyq saqtaý júıesiniń jáı-kúıi týraly obektıvti aqparatty jáne ashyq derekterdi ornalastyrý jónindegi fýnktsııany engizý boıynsha tolyqtyrý engiziledi. «Ekologııalyq kodekske» oblystyń, respýblıkalyq mańyzy bar qalanyń, astananyń jergilikti atqarýshy organdaryna jyl saıyn 1 mamyrǵa deıin óziniń resmı ınternet-resýrsynda ótken jylǵy qorshaǵan orta sapasy boıynsha nysanaly kórsetkishterdiń naqty nátıjeleri, jergilikti deńgeıde ekologııalyq saıasatty iske asyrý barysy, jergilikti bıýdjetke qorshaǵan ortaǵa teris áser etkeni úshin túsken tólemderdiń jalpy somasy týraly aqparatty ornalastyrýǵa mindetteıtin normalar engizildi, - dedi senator Amangeldi Tolamısov.

Onyń aıtýynsha, zań ashyq memleket qaǵıdatyn damytyp, azamattardyń memlekettik organdardyń qyzmetine qol jetkizilýi shektelmegen aqparattardy erkin alýyn qamtamasyz etedi. Bul óz kezeginde elimizde azamattyq qoǵamdy nyǵaıtyp, halyqtyń memlekettik basqarýǵa qatysýyn yntalandyrady.

Sonymen qatar, «Qazaqstan Respýblıkasynyń memlekettik nagradalary týraly» Zańyna Memlekettik nagradalar alý úshin qoıylatyn talaptardy jetildirýge baǵyttalǵan túzetýler engiziledi. Máselen, memlekettik nagradalar qatarynan Qazaqstan Respýblıkasynyń Qurmet gramotasyn alyp tastaý, «Dańq» ordenimen kúshtik qurylymdardyń tek basshylyq quramdaǵy adamdaryn marapattaý syndy túzetýler qaralǵan.

Budan bólek, «Qazaqstan Respýblıkasyndaǵy til týraly» Zańyna kórneki aqparat quraldaryn ornalastyrý bóliginde, olardy aldyn ala jergilikti atqarýshy organdarmen kelisý týraly normalar engizilip otyr.

Zańdy Parlament Senatynda qaraý barysynda jospardan tys tekserý taǵaıyndaý negizderi, sondaı-aq tekseretin memlekettik organnyń quqyqtary men mindetterin belgileý bóliginde tolyqtyrýlar engizildi. Barlyq túzetýler Qazaqstan Respýblıkasy Kásipkerlik kodeksiniń normalaryna sáıkes keltirildi.

- Zańdy qaraý barysynda, aqparatqa qol jetkizý salasyndaǵy ýákiletti organǵa aqparatqa qol jetkizý salasyndaǵy memlekettik baqylaý quzyretin berý bóliginde eskertýler men usynystar kelip tústi. Olar memlekettik baqylaýdy taǵaıyndaý negizderin tolyqtyrýǵa, sondaı-aq tekserýshi memlekettik organnyń quqyqtary men mindetterin belgileýge baǵyttalǵan, - dedi depýtat.