Senat tegin medıtsınalyq kómektiń múmkindikterin keńeıtetin zańdy maquldady
ASTANA. KAZINFORM — Senat tegin medıtsınalyq kómektiń múmkindikterin keńeıtetin zańdy eki oqylymda maquldady.
— Bul zań medıtsınalyq kómektiń biryńǵaı bazalyq paketin qalyptastyrý mehanızmderin aıqyndaıdy. Tegin medıtsınalyq kómektiń kepildik beriletin kólemi (TMKKK) jáne MÁMS júıesinde kórsetiletin medıtsınalyq qyzmet túrleriniń arajigin ajyratyp, olardy naqty belgileıdi. Bul, medıtsınalyq kómektiń qoljetimdiligi men sapasyn, tıimdiligin arttyrýǵa múmkindik beredi, — dedi qujatqa qorytyndy bergen senator Ásem Rahmetova.
Onyń sózinshe, bul zań eńbekaqysy joǵary qyzmetkerler úshin MÁMS júıesine jarna men aýdarym tóleýde jeńildikterdi joıyp, áleýmettik osal sanattaǵy azamattardy barlyq deńgeıdegi medıtsınalyq kómekke qol jetkizý múmkindigin arttyrady.
— Máselen, TMKKK kólemi sheńberinde orfandyq aýrýlardy emdeýge arnalǵan dárilik zattarmen qamtamasyz etý, olarǵa dıagnostıka jasaý jáne mamandandyrylǵan statsıonarda kútim jasaý kózdelip otyr. Sondaı-aq, elimizde saqtandyrý júıesinen tys qalǵan áleýmettik álsiz toptaǵy jáne jumyssyz júrgen azamattarǵa medıtsınalyq kómekke júgingen jaǵdaıda óńirlerdiń bıýdjetinen jarna tóleý belgilengen, — dedi depýtat.
Zań MÁMS júıesine bıýdjetten tólenetin jarnalar mólsherlemeleriniń kezeń-kezeńimen arttyrý arqyly azamattar men bızneske shamadan tys qarjylyq júktemeni azaıtýdy kózdeıtin normalar qaralǵan jáne medıtsınalyq qyzmettiń sapasyn artyrý maqsatynda medıtsınalyq qyzmetter (kómek) kórsetý salasyndaǵy ýákiletti organǵa qadaǵalaý fýnktsııasy qaıta berilip otyr.
Eske salsaq, mınıstrlik MÁMS júıesin joıýdy talap etken petıtsııaǵa jaýap bergen bolatyn.