Senat tegin medıtsınalyq kómekke qatysty zań jobasyn birinshi oqylymda maquldady
A. Qarashanyń 12-si. QazAqparat /Qanat Mámetqazyuly/ ‑ Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine tegin medıtsınalyq kómektiń kepildik berilgen kólemin usyný máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady,
dep habarlaıdy QazAqparat.
Atalǵan zań jobasy qoldanystaǵy keıbir zańnamalyq aktilerdiń jekelegen normalaryn Qazaqstan Respýblıkasynyń biryńǵaı ulttyq densaýlyq saqtaý júıesine sáıkes keltirý sheńberinde ázirlengen. «Qujat azamattardyń medıtsınalyq uıym men dárigerdi erkin tańdaýǵa qatysty konstıtýtsııalyq quqyqtaryn qamtamasyz etýge baǵyttalady. Zańdy qabyldaý nátıjesinde densaýlyq saqtaý salasyndaǵy ekonomıkalyq jáne áleýmettik jaǵdaıdy jaqsartý kútiledi. Patsıenttiń medıtsınalyq uıym men dárigerdi erkin tańdaýǵa qatysty quqyǵy, medıtsınalyq kómek kórsetýge oraı tarıfterdiń teńdigi iske asyrylyp, densaýlyq saqtaý salasyndaǵy naryqtyq qatynastar engiziledi. Medıtsınalyq qyzmetter kórsetýdiń ashyqtyǵy qamtamasyz etilip, densaýlyq saqtaý salasynda sybaılas jemqorlyqtyń paıda bolýyna negizgi alǵysharttar joıylatyn bolady», dedi zań jobasy boıynsha baıandaǵan Densaýlyq saqtaý mınıstri Jaqsylyq Dosqalıev.
Jalpy alǵanda joba densaýlyq saqtaýdyń qarjylandyrý júıesin jetildirýge, ony basqarýdyń tıimdi jáne aıqyn júıesin qurýǵa baǵyttalyp otyr.
Birinshi oqylymda maquldanǵan zań jobasy ekinshi oqylymǵa ázirleý úshin Bas komıtetke tapsyrylady.
