Senat taǵy da Joǵarǵy sot sýdıalaryn qyzmetinen bosatty
ASTANA. KAZINFORM – Búgin Senattyń jalpy otyrysynda QR Joǵarǵy sotynyń sýdıalary qyzmetinen bosatyldy.
Palata otyrysynda Joǵary sot keńesiniń tóraǵasy Dmıtrıı Malahov Prezıdenttiń usynymyn oqyp berdi.
— Senattyń qaraýyna Dosjan Sarmanqululy otstavkaǵa ketýine baılanysty Joǵarǵy sottyń sýdıasy qyzmetinen bosatý týraly Memleket basshysynyń usynysy engizildi. Sýdıa zeınetkerlik jasqa toldy. Ol sýdıalar qoǵamdastyǵynda joǵary bedelge ıe, — dedi Dmıtrıı Malahov.
Sonymen qatar Joǵarǵy sot sýdıasy qyzmetinen German Karımuly Nurbaev bosatyldy. Ol jaqynda TMD Ekonomıkalyq sotynyń tóraǵasy laýazymana saılanǵan edi.
Senatorlar bul usynysqa qoldaý bildirip daýys berdi.
Dosjan Sarmanqululy Jambyl oblysynda týǵan. 1988 jyly Qaraǵandy memlekettik ýnıversıtetin bitirgen, zańger.
Eńbek joly: 1979-1980 jyldary Jambyl oblysy Chapaev atyndaǵy sovhozda tok dánekerleýshi, 1982-1988 jyldary sovhozdyń mashına aýlasynyń slesari, 1988-1989 jyldary Petropavl qalasynyń zań keńsesiniń advokattar alqasynda taǵylymdamashy, 1989 jyly Petropavl qalasynyń advokaty, sol jyly Soltústik Qazaqstan oblysy Tımırıazev aýdandyq sotynyń sýdıasy bolyp qyzmet atqarǵan. 1990 jyly SQO Lenın aýdandyq sotynyń sýdıasy, 1990-1997 jyldary Soltústik Qazaqstan oblystyq sotynyń múshesi, 1997-1999 jyldary Soltústik Qazaqstan oblystyq sotynyń sýdıasy, 1999-2002 jyldary Temirtaý qalasy sotynyń tóraǵasy, 2002-2007 jyldary Soltústik Qazaqstan oblystyq sotynyń qylmystyq ister jónindegi alqasynyń tóraǵasy, 2007-2009 jyldary Astana qalasy sotynyń qylmystyq ister jónindegi alqasynyń tóraǵasy, 2009-2010 jyldary Jambyl oblystyq sotynyń qylmystyq ister jónindegi alqasynyń tóraǵasy, 2010-2011 jyldary Jambyl oblystyq sotynyń apellıatsııalyq sot alqasynyń tóraǵasy, 2011-2015 jyldary Mańǵystaý oblystyq sotynyń tóraǵasy, 2015-2017 jyldary Shyǵys Qazaqstan oblystyq sotynyń tóraǵasy, 2017-2022 jyldary Aqmola oblystyq sotynyń tóraǵasy laýazymyn atqardy.
German Karımuly Nurbaev 1968 jyly Semeı oblysy, Qaraýyl aýylynda dúnıege kelgen.
Qazaqstan Respýblıkasy Joǵarǵy Sotynyń sýdıasy qyzmetinde 2021 jyldan beri atqaryp keldi.
Budan buryn habarlanǵandaı, bıyl 19 maýsymda Senattyń jalpy otyrysynda Joǵarǵy sotynyń bir sýdıasy laýazymynan bosatylǵan edi.