Senat sybaılas jemqorlyqqa yqpal etetin normalardy joıýǵa baǵyttalǵan qujatty Májiliske qaıtardy
ASTANA. 6 maýsym. QazAqparat - Búgin Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine ártúrli zańnamalyq aktilerdiń quqyq normalary arasyndaǵy qaıshylyqtardy,
olqylyqtardy, kollızııalardy jáne sybaılas jemqorlyq quqyq buzýshylyqtar jasaýǵa yqpal etetin normalardy joıý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda talqylandy. Senat tarapynan birqatar usynystar engizilgendikten, zań jobasy Májiliske qaıtaryldy.
Atalǵan qujat elimizdiń quqyqtyq saıasat tujyrymdamasyn iske asyrý maqsatynda ázirlengen. Bul rette qoldanystaǵy zańnamany eskirgen jáne bir-birin qaıtalaıtyn normalardan aryltý, quqyqtyq retteýdegi olqylyqtardyń ornyn toltyrý, qoldanylyp júrgen quqyqtyq ishki qaıshylyqtardy joıý qajettigi atap kórsetilgen bolatyn. Osyǵan baılanysty zań jobasymen 33 zańnamalyq aktige túzetý engizý kózdelgen. Atap aıtqanda, Іshki ister mınıstrligine memlekettiń áleýmettik sıpattaǵy tótenshe jaǵdaılarda áreket jasaýynyń quqyqtyq tetigin belgileýge baǵyttalǵan 13 zań aktisine túzetý engizý usynylady. Sonymen qatar, sybaılas jemqorlyq quqyq buzýshylyqtardyń jasalýyna yqpal etetin normalardy alyp tastaý qarastyrylady.
Talqylaý barysynda senatorlar birqatar ózgeristerdi usyndy. Atap aıtqanda, zań jobasymen Qylmystyq Kodekstiń 241-babynyń úshinshi bóliginde kózdelgen áreketter úshin jaza qatańdatylady. Atap aıtqanda, bas bostandyǵynan aıyrý túrindegi jazanyń eń joǵarǵy merzimi 6 jylǵa deıin ulǵaıtylǵan. Osy ózgeriske baılanysty joǵarydaǵy bapta kórsetilgen qylmystar aýyrlyǵy ortasha qylmystar sanatynan aýyr sanatyna aýysady. Alaıda, osyǵan qatysty zań jobasymen tıisti ózgerister engizilmegen. Budan bólek, taǵy birqatar ózgerister usynylyp otyr.
