Senat sýdıalardyń táýelsizdigin kúsheıtýge baǵyttalǵan zań jobasyn birinshi oqylymda maquldady
ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń sot júıesi men sýdıalarynyń mártebesi týraly» QR Konstıtýtsııalyq zańyna ózgerister men tolyqtyrýlar engizý týraly» QR Konstıtýtsııalyq zań jobasyn birinshi oqylymda maquldady.
Qujat sýdıalar táýelsizdigin kúsheıtýge, sýdıa laýazymdaryna kandıdattardy konkýrstyq irikteý rásimderin jetildirýge baǵyttalǵan. Budan bólek, sýdıa laýazymyna kandıdattardy irikteýde jurtshylyqtyń rólin kúsheıtý máseleleri qaralatyn bolady. Atap aıtqanda, zań jobasymen oblystyq sot tóraǵalaryna kandıdattardy irikteýde sýdıalyq ótildiń bolý mindeti bes jyldan on jylǵa deıin kóteriledi. Bul jalpy sýdıalyq korpýstyń kadrlyq áleýetiniń artýyna oń yqpalyn tıgizetin bolady.
Sonymen qatar zań jobasymen oblystyq jáne oǵan teńestirilgen sottardyń, Joǵarǵy Sottyń qyzmetin jetildirý maqsatynda olardyń quramynda jalpy otyrystyń quzyretine kirmeıtin jáne tez arada sheshýdi talap etetin sot júıesiniń qyzmetine qatysty jeke organ qurý usynylady. Atalǵan organ quzyretine sottardyń jumystaryn tekserý, sottar men buqaralyq aqparat quraldarynyń qyzmetin úılestirý jáne tez arada sheshýdi talap etetin aǵymdaǵy máseleler jatady. Budan bólek, sýdıalarǵa sottyń sheshimi zańdy kúshine enbegen ister boıynsha jurtshylyq aldynda pikir bildirýge tyıym salynatyn bolady. Ádil sot tóreligine jáne onyń táýelsizdigine zalalyn tıgizýi múmkin málimdemeler nemese eskertýler jasaýdan bas tartý týraly sottyń mindeti de bekitilip otyr.
Budan basqa, basshy sýdıa laýazymyna, aýdandyq sot tóraǵasy, Joǵarǵy Sot sýdıalary men sot alqalary tóraǵalary laýazymdaryna úmitkerlerdi irikteý kezinde kadr rezervinde turǵan adamdarǵa basymdyq berý kózdeledi.
