Senat sýdıalardyń kásibıligi men jaýapkershiligin arttyrýǵa baǵyttalǵan zańdy qabyldady
NUR-SULTAN. QazAqparat – Senattyń jalpy otyrysynda «Qazaqstan Respýblıkasynyń sot júıesi men sýdıalarynyń mártebesi týraly» QR Konstıtýtsııalyq zańyna ózgerister men tolyqtyrýlar engizý týraly» QR Konstıtýtsııalyq Zańy qabyldandy, dep habarlaıdy QazAqparat tilshisi.
«QR Prezıdentiniń janyndaǵy Sot jáne quqyq qorǵaý júıelerin reformalaý jóninde komıssııa ázirlegen sot júıesin jetildirý jónindegi tásilderdi iske asyrý maqsatynda Parlament depýtattary atalǵan zań jobasyna bastamashylyq jasady. Zań jobasynyń negizgi mindetteri - sýdıalar korpýsyn qalyptastyrý tetigin jetildirý, zańnyń ústemdigin jáne sot júıesiniń táýelsizdigin belgileý boıynsha júrgizilip jatqan sot reformasynyń basym baǵyttaryn qamtamasyz etý», - dedi senator Qanatbek Safınov.
Onyń aıtýynsha, zań jobasyndaǵy túzetýlerdi eki blokqa bólip qarastyrýǵa bolady. Birinshiden, sýdıalar korpýsynyń kásibıligin arttyrý jáne sot júıesine quqyqtyń tar salalarynyń mamandaryn tartý. Ekinshiden, sýdıalardyń jaýapkershiligi men táýelsizdigin arttyrý jáne sot júıesin qarjylandyrýdyń jańa modelin belgileý.
«Birinshi blok boıynsha neǵurlym kúrdeli salalarda mamandanǵan sýdıalyqqa kandıdattar mamandandyrylǵan biliktilik emtıhanyn tapsyrýdy qamtıtyn jeke konkýrstan ótetin bolady. Sot tóreliginiń sapasy jónindegi komıssııa Joǵary sot Keńesimen aldyn ala kelisilgennen keıin Joǵarǵy sottyń jalpy otyrysy bekitetin tıisti ádisteme negizinde sýdıalardyń kásibı qyzmetine baǵalaý júrgizedi. Aýdandyq sottarda teń dárejeli laýazymdarǵa kandıdattardy irikteý kezinde shalǵaıdaǵy nemese quramy az sottarda keminde bes jyl jumys istegen sýdıalar basymdyqqa ıe bolady», - dedi depýtat.
Ekinshi blok boıynsha sýdıalardyń jaýapkershiligin arttyrý maqsatynda sýdıany tártiptik jazaǵa tartý merzimderi teris qylyq anyqtalǵan kezden bastap úsh aıdan bir jylǵa deıin jáne ol jasalǵan kezden bastap bir jyldan eki jylǵa deıin ulǵaıady.
«Halyqaralyq tájirıbege súıene otyryp, sot júıesiniń bıýdjetin qalyptastyrýdyń qaǵıdatty jańa modeli usynylady, onyń mólsheri jyl saıyn barlyq memlekettik organdar shyǵystarynyń keminde 6,5% paıyzyn quraıtyn bolady. Shyǵystardy bólý máselelerin sheshý boıynsha Joǵarǵy sottyń keńeıtilgen jalpy otyrysy – sýdıalyq ózin-ózi basqarý organynyń rólin kúsheıtý kózdeledi. Bul rette aqshalaı túsimderdiń nysanaly paıdalanylýyn baqylaý Esep komıtetiniń esebinen saqtalady. Osy zań jobasyna engiziletin túzetýler sýdıalardyń kásibı bilimi men iskerliginiń deńgeıin arttyrýǵa jáne sýdıalar korpýsynyń sapalyq quramyn jaqsartýǵa, sot júıesiniń qarjylyq táýelsizdigin jáne aqsha qarajatyn bólý máselelerin sheshýde sýdıalardyń ózin-ózi basqarý organdarynyń derbestigin nyǵaıtýǵa múmkindik beredi», - dedi Qanatbek Safınov.
Sonymen qatar, búgingi jalpy otyrysta senatorlar «Qazaqstan Respýblıkasynyń keıbir zańnamalyq aktilerine sot júıesi máseleleri boıynsha ózgerister men tolyqtyrýlar engizý týraly» Zańyn eki oqylymda qarap, qabyldady.
