Senat Sý kodeksin Májiliske qaıtardy
ASTANA. KAZINFORM – Búgin Senattyń jalpy otyrysynda Qazaqstan Respýblıkasynyń Sý kodeksi men ilespe qujat eki oqylymda qaraldy. Senat qujattardyń jekelegen baptaryn jańa redaktsııada usynyp, ony Májiliske qaıtardy.
- Jańa Sý kodeksi aıasynda sý obektilerin utymdy paıdalaný, strategııalyq josparlaýdyń jańa quraldaryn engizý, gıdrotehnıkalyq qurylystardy basqarýǵa kóńil bólý, sý resýrstarynyń monıtorıngi men basqarýdyń ulttyq aqparattyq júıesin qurý, sýdy utymdy paıdalaný, ysyrapty azaıtý jáne sýdy únemdeý tehnologııalaryn engizý, klımattyń ózgerýine baılanysty sýdy durys paıdalanýǵa beıimdeý, quqyq buzý faktilerine jedel den qoıý maqsatynda ýákiletti organǵa qadaǵalaý fýnktsııalaryn berý men balamaly sý kózderin jınaqtaý ári paıdalaný máselelerine kóńil bólingen. Іlespe zań qoldanystaǵy zańnamany jańa Sý kodeksiniń normalaryna sáıkes keltirý men sý resýrstaryn qorǵaý jáne paıdalaný salasyndaǵy qatynastardy quqyqtyq retteýdi jetildirý maqsatynda ázirlendi, - dedi senator Janbolat Jórgenbaev.
Zańda Azamattyq, Jer, Orman, Kásipkerlik jáne Ekologııa kodeksterine, sondaı-aq, qoǵamdyq qatynastardyń ártúrli aspektilerin retteıtin 13 zańǵa ózgerister men tolyqtyrýlar engizý kózdeledi. Jalpy, depýtattar negizgi jáne ilespe zańǵa 13 túzetý engizýge bastamashy bolyp, jumys tobynyń 5 otyrysyn ótkizdi.
Sý kodeksin, sondaı-aq, ilespe zańdy talqylaý jáne olardy ekinshi oqylymǵa ázirleý barysynda Bas komıtettiń, Qarjy jáne bıýdjet komıtetiniń eskertýleri men usynystaryn eskere otyryp, Kodeks pen Іlespe zańdy daıyndaý barysynda mynadaı túzetýler engizildi:
- sý resýrstaryn paıdalanǵany úshin tólemge baılanysty birqatar normalardy Salyq kodeksine sáıkes keltirý;
- turǵyn úı qatynastary jáne turǵyn úı-kommýnaldyq sharýashylyq salasyndaǵy ýákiletti organnyń quzyretin naqtylaý;
- arnaýly sý paıdalanýǵa ruqsattan aıyrý tártibin naqtylaý;
- sý qoryn qorǵaý jáne paıdalaný salasyndaǵy memlekettik baqylaý men qadaǵalaýǵa baılanysty normalardy Kásipkerlik kodeksiniń normalaryna sáıkes keltirý;
- basseındik sý ınspektsııalary júzege asyratyn memlekettik baqylaýdyń ataýyn naqtylaý bóliginde Kásipkerlik kodeksine ózgeris engizý qajettiligi týyndady.
Eske salsaq, bıyl naýryz aıynyń basynda Parlament Májilisi Sý kodeksin qabyldady.