Senat spıkeri: Jastardyń otanshyldyq rýhy uranshyldyqqa negizdelmeýi tıis
«Qazir álem kún sanap qubylý ústinde. Jahan damýynyń keıbir tustary adamzat úshin únemi tıimdi bola bermeıtini daýsyz. Halyqaralyq ahýal shıelenisken kezeńde bizdiń memleketimizdiń qaýipsizdigine tónetin syn-qaterler de arta túsedi. Osyndaı asa kúrdeli álemdik ahýalda eldigimizdi saqtap qalý men tabysty damýdyń birden-bir joly, shyn máninde ult bolyp uıysa otyryp, áreket etý ekenin túsinýimiz qajet. Bir sózben aıtqanda, Qazaqstan halqynyń jarqyn bolashaǵyn qamtamasyz etý tikeleı ózimizdiń is-áreketimizge baılanysty. Memlekettiń damýy, onyń qaýipsizdigin qamtamasyz etý jáne ultymyzdyń órkendeýi bizdiń ózimizden basqa eshkimge qajet emes ekeni anyq. Sondyqtan biz jastardy otansúıgishtik rýhta tárbıeleýdiń asa mańyzdy mindet ekeni týraly sóz qozǵap otyrmyz. Alaıda, jastardyń otanshyldyq rýhy jalań uranshyldyq pen joǵary mansapqa emes, eń aldymen, tereń bilimge negizdelýi tıis», - dedi Senat tóraǵasy.
Osy oraıda ol keleshek - shynaıy bilimmen qarýlanǵandardyń qolynda ekenin atap ótti. Innovatsııalyq tabysqa qol jetkizgen jáne sol jetistikterdi óz halqynyń ıgiligi úshin paıdalana bilgen memleketter ǵana kósh aldynda bolary anyq.
«Bul oraıda, damyǵan elder jasandy ıntellekt pen ózge de mańyzdy ǵylymı zertteýlerge aıtarlyqtaı qarajat bólip otyrǵany kezdeısoq jaǵdaı emes. Basqasha aıtqanda, álem qaýymdastyǵy aıqyn qarama-qaıshylyqtardyń aldynda tur. Ǵylym men jańa tehnologııalarǵa den qoıǵan memleketterdiń joly dańǵyl bolary sózsiz. Qalǵandary kúnkóristiń qamyn kúıttep, joly bolyp jatsa daıyn ǵylymı ónimdi tutynýshylardyń qataryna qosylady.
Sondyqtan álemdik damýda oryn alyp otyrǵan boljamdarǵa nemquraıly qaramaı, tıisti qorytyndy shyǵarýymyz qajet. Bul tusta jastardyń kúsh-jigeri men belsendiliginiń asa mańyzdy ekenin aıtý kerek», - dedi Q. Toqaev.
