Senat spıkeri Japonııa elshisimen kezdesti
Kezdesý barysynda Senat spıkeri Qazaqstan Prezıdenti Qasym-Jomart Toqaev belgilep bergen Táýelsizdiktiń jańa kezeńindegi el damýynyń negizgi basymdyqtaryna toqtaldy. Máýlen Áshimbaev Palatanyń aldaǵy basty mindeti Memleket basshysynyń elimizdi jańartý baǵdaryn sapaly zańdarmen qamtamasyz etý bolyp qala beretinin jetkizdi.
Senat tóraǵasy qazirgi tańda elimizde shaǵyn jáne orta bıznesti damytý úshin jaǵdaı jasaýǵa, memlekettiń ekonomıkaǵa qatysýyn azaıtýǵa, áleýmettik teńsizdikti tómendetýge jáne óńirlerdi damytýdaǵy dısproportsııany qysqartýǵa arnalǵan júıeli sharalar iske asyrylyp jatqanyn aıtty. Sondaı-aq ol búginde Qazaqstanda júrgizilip jatqan memlekettik basqarý júıesin jańartý merıtokratııa, ashyqtyq jáne sybaılas jemqorlyqqa qarsy kúres qaǵıdattaryn kúsheıtýdi qamtıtynyn atap ótti.
Sonymen qatar suhbattasýshylar Qazaqstan men Japonııa arasyndaǵy parlamentaralyq yntymaqtastyqty nyǵaıtý máselelerine nazar aýdardy.
«Parlamentaralyq qarym-qatynas bizdiń jumysymyzdyń mańyzdy baǵyty bolyp sanalady. Osy rette biz japon áriptesterimizben baılanysymyzdy jandandyryp, Japonııa Parlamentindegi Dostyq lıgasymen ózara qatynasymyzdy damytýǵa múddelimiz. Birlesip pysyqtaıtyn máseleler az emes. Olar ekonomıka, saýda, ınvestıtsııalar, Qazaqstanǵa jasyl tehnologııalardy tartý sııaqty baǵyttardy qamtıdy. Ekologııa, halyqaralyq máseleler, onyń ishinde, Aýǵanstandaǵy ahýal boıynsha yntymaqtastyqtyń da mańyzy zor. Parlament depýtattaryna osy taqyryptardyń bárin talqylap, eki eldiń Úkimetterimen birlesip, qandaı da bir bastamalar men jobalardy iske asyrýǵa mol múmkindik bar», – dedi Máýlen Áshimbaev.
Óz kezeginde elshi Japonııa parlamentshileri de qazaqstandyq áriptesterimen yntymaqtastyqty jandandyrýǵa nıetti ekenin aıtty.
Sondaı-aq dıplomat japon tarapy Qazaqstan Prezıdentiniń eldegi ınvestıtsııalyq ahýaldy saqtaý jáne odan ári jaqsartý jónindegi ustanymyn joǵary baǵalaıtynyn tilge tıek etti.
Ol sondyqtan japon ınvestorlary Qazaqstan ekonomıkasyna ınvestıtsııa salýdy jalǵastyrýǵa qulyqty ekenin atap ótti.
Іs-shara sońynda Máýlen Áshimbaev Senattyń zań shyǵarý qyzmetine toqtaldy.
Onyń aıtýynsha, byltyr senatorlar 104 zań qabyldady.
Olardyń árbir tórtinshisine Parlament depýtattary bastamashy boldy.
Senat tóraǵasy bul zańdardyń bári elimizdiń saıası jáne áleýmettik-ekonomıkalyq damýyn qamtamasyz etýge arnalǵanyn aıtty.
