Senat spıkeri retinde Otanymyzdyń gúldenýi úshin bar kúsh-jigerimdi jumsaımyn – Darıǵa Nazarbaeva
NUR-SULTAN. QazAqparat - Búgin Senat spıkeri bolyp saılanǵan Darıǵa Nazarbaeva áriptesterine qoldaý kórsetkeni úshin rızashylyq bildirdi, dep habarlaıdy QazAqparat tilshisi.
«Maǵan senip, úlken qoldaý kórsetkenderińiz úshin rahmet aıtqym keledi. Bul men úshin zor mártebe jáne úlken jaýapkershilik. QR Parlamenti joǵary palatasynyń basshysy retinde men súıikti Otanymyzdyń gúldenýi úshin bar kúsh-jigerimdi, bilimim men tájirıbemdi jumsaımyn», - dedi Senat spıkeri.
Sonymen qatar ol Qasym-Jomart Toqaev búgin halyqqa arnalǵan alǵashqy Joldaýyn Parlament palatalarynyń birlesken otyrysynda jarııa etkenin eske saldy.
«Joldaýda el ómiriniń barlyq salalaryndaǵy ahýalǵa tereń taldaý jasalyp, naqty praktıkalyq mindetter qoıyldy. Endi biz olardy zańdar men qaýlylar tiline kóshirýimiz kerek. Barlyq áriptesterimizdi tyǵyz jumys kestesine tezirek kirisýge shaqyramyn. Bul úshin kúzdiń jańa qyzmet jospary is júzinde qurylǵan. Jumys kólemi ósip qana qoımaı, olardyń sapasyna da qoıylatyn talap edáýir artatynyn jetkizgim keledi», - dedi D.Nazarbaeva.
