Senat spıkeri Ortalyq Azııa elderiniń parlamentaralyq forýmynda Aral máselesin kóterdi
«Parlamentaralyq forým reformalardy zańnamalyq qamtý tájirıbesimen almasý alańy bola alady. Qazaqstandyq tarap salyq zańnamasyn reformalaý jónindegi jumystar boıynsha tájirıbe almasýǵa daıyn. Qazir bizde ulttyq tabysty barynsha ádil bólýdi qamtamasyz etý baǵytynda úlken jumys atqarylýda. Biz jańa qoǵamdyq kelisimniń negizin qalaıtyn Áleýmettik kodeksti daıyndaý tájirıbesin de bólisýge daıynbyz. Áriptesterimiz de zań shyǵarý jáne júıeli qaıta qurý tájirıbesin ortaǵa salýǵa daıyn ekenine senimdimin», - dedi Máýlen Áshimbaev.
Senat spıkeri óńirdiń ózekti máselelerin – transshekaralyq ózenderdi birlesip paıdalaný, ekologııalyq jáne energetıkalyq turaqtylyqty qamtamasyz etý, ózge de máselelerdi sheshý úshin forým áleýetin paıdalaný mańyzdy ekenin aıtty.
«Parlamenttiń kúsh-jigerin Ortalyq Azııa óńiri úshin ortaq sý problemasyna jumyldyrýǵa bolady. Sońǵy jyldary Aral máseleleri, onyń kebý saldaryn azaıtý jáne teńizdiń qalǵan bóliginiń taıazdaýyna jol bermeý boıynsha ózbek áriptesterimen belsendi jumys istep jatyrmyz. Aral teńiziniń apaty Qazaqstan men Ózbekstan ǵana emes, Ortalyq Azııanyń barlyq eline zalal keltiredi», - dedi palata tóraǵasy.
Máýlen Áshimbaev basqa elderdiń parlamentshilerin birlesken jumysqa qosylýǵa shaqyrdy.
«Muzdyqtardyń erýi, aımaqtyń negizgi sý arterııalary aǵynynyń azaıýy da ózekti bolyp otyr. Bul bizdiń elderimizdiń azyq-túlik qaýipsizdigine, energetıkalyq jáne ekologııalyq turaqtylyǵyna eleýli qaýip tóndiredi. Bul máselelerdi sońǵy jyldary tájik áriptesterimiz belsendi kóterip keledi. Parlamentshiler osy ózekti máseleler men syn-qaterlerdi jeńildetýge óz úlesin qosa alar edi», - dedi Máýlen Áshimbaev.
Buǵan deıin habarlanǵandaı, Túrkistanda Ortalyq Azııa memleketteriniń birinshi Parlamentaralyq forýmy ótti.
Qazaqstan Prezıdenti Qasym-Jomart Toqaev Ortalyq Azııa memleketteriniń Parlamentaralyq forýmyna qatysýshylarǵa quttyqtaý hat joldady.
