Senat spıkeri maıdandaǵy qazaqstandyqtardyń batyrlyǵyn umytpaýǵa shaqyrdy
Spıker atap ótkendeı, Qazaqstan dalasynan maıdanǵa 1 mln 360 myńnan astam qazaqstandyq attandy. 600 myńǵa jýyq otandasymyz urys dalasynda máńgi qaldy. 500 jerlesimiz Keńes Odaǵynyń Batyry ataǵyn aldy.
«Degenmen, ártúrli sebeptermen laıyqty marapatqa ıe bolmaǵan, «umyt qalǵan qaharmandar» bar. Olar týraly arhıvtik málimetterdi ǵalym jáne qoǵam qaıratkeri Berik Ábdiǵalıuly jınaqtap, 2019 jyly Nur Otan partııasynyń qoldaýymen jaryqqa shyǵardy», - deıdi Senat spıkeri.
«Umytylǵan qaharmandar – Zabytye geroı» kitabynda Keńes Odaǵynyń Batyry ataǵyna usynylǵan, biraq ala almaǵan 133 qazaqstandyqtyń tarıhy men muraǵattyq qujattary jınaqtalǵan. Osy «umytylǵan qaharmandardyń» altaýy eki ret usynylǵan. Al, Shyǵys qazaqstan oblysy Zyrıan qalasynyń týmasy Aleksandr Nesmııanov úsh ret usynylyp, úsheýinde de eleýsiz qalǵan.
Osy dańqty batyrlardyń esimderi jáne olardyń erlikteri qazaqstandyqtardyń kópshiligine tanys emes», - dep jazady Máýlen Áshimbaev.
Jeńis kúni qarsańynda úsh «umytylǵan qaharmanǵa» qatysty tarıhı ádildik ornady. El Prezıdenti Qasym-Jomart Kemeluly Toqaevtyń Jarlyǵymen 1941-1945 jyldardaǵy Uly Otan soǵysynda kórsetken erligi men batyrlyǵy úshin «Halyq Qaharmany» ataǵy mergender Tóleýǵalı Ábdibekovke, Ybyraıym Súleımenovke jáne atqyshtar batalonynyń komandıri Aleksandr Nesmııanovqa qaıtys bolǵannan keıin berildi.
«Biz Jeńis kúnin batyrlardyń qurmeti úshin atap ótemiz. Sonymen qatar, mıllıondaǵan qurbandardy, soǵystan zardap shekkenderdi qaıǵyra eske alamyz. Bul kún jeńistiń qandaı jolmen kelgenin este saqtaý úshin qajet. Bul kún beıbitshilik pen turaqtylyqtyń qundylyǵyn seziný úshin mańyzdy», - dep túıindeıdi Máýlen Áshimbaev.
