Senat spıkeri Q. Mámı prokýratýra qyzmetkerlerin kásibı merekelerimen quttyqtady
ASTANA. 6 jeltoqsan. QazAqparat - Búgin Qazaqstan prokýratýrasy qyzmetkerleri kásibı merekelerin atap ótýde.
Osyǵan oraı, Senat spıkeri Qaırat Mámı óziniń ınternettegi paraqshasy arqyly prokýratýra qyzmetkerleri men ardagerlerin kásibı merekelerimen quttyqtady.
«Táýelsizdik alǵannan beride, prokýratýra organdary elimizde demokratııalyq júıe qalyptastyrýda, áleýmettik-ekonomıkalyq damýda ońdy nátıjelerge qol jetkizýde úlken úles qosty. Quqyqtyq saıasat tujyrymdamasynda Elbasy Prokýratýra - quqyq qorǵaý organdarynyń túp qazyǵy ekenin atap aıtyp, osy talapqa saı prokýratýra organdary aldyna jańa mindetter qoıdy.
Prezıdent Nursultan Nazarbaevtyń jetekshiligimen qoldanystaǵy zańnamalyq baza qaıta qaraldy. «Prokýratýra týraly» zańǵa engizilgen prokýratýra organdarynyń qadaǵalaýshy qyzmetiniń profılaktıkalyq baǵyty men qarqyndylyǵyn, olardyń úılestirýshi fýnktsııasyn kúsheıtýge, tutas alǵanda, jeke adamdardyń konstıtýtsııalyq quqyqtary men bostandyqtaryn jáne zańdy tulǵalardyń múddelerin qorǵaý deńgeıin arttyrýǵa baǵyttalǵan zańnamalyq jańalyqtar prokýratýranyń quqyq qorǵaýshy qyzmetine jańa serpin berdi», - dep jazady Senat spıkeri.
Bul rette Tóraǵa árqashanda joǵary kásibı daıarlyǵymen, jáne jeke basynyń kirshiksiz tazalyǵymen erekshelenetin prokýratýra qyzmetkerleriniń óz isi men abyroı aldyndaǵy adaldyǵy Ar-namys Kodeksin qabyldaýymen nyǵaıa, bekı tústi degen senimin bildiredi. Onyń aıtýynsha, elde zańdylyq pen quqyqtyq tártipti qoldaý jónindegi memlekettik organdardyń áreketterin biriktire otyryp, Bas prokýratýra úılestirýshi fýnktsııany da atqarady.
«Qurmetti prokýratýra organdarynyń qyzmetkerleri!
Sizderdiń el aldyndaǵy zań buzýshylyqty boldyrmaý, qadaǵalaý baǵytyndaǵy jumystaryńyz árqashan da jaýapty. Ásirese, búgingi qarjy daǵdarysy kezinde jurtshylyqtyń áleýmettik jaǵdaıyna qorǵan bola bilý Sizderge eń úlken mindet bolyp tabylady.
Ótken kezeń ishinde prokýratýra organdary, ásirese halyqtyń eńbek quqyǵyn qorǵaý, qylmyspen jáne sybaılas jemqorlyqpen kúres, memleket pen azamattardyń zańdy múddelerin qorǵaý, elimizdiń birtutas quqyqtyq keńistigin qamtamasyz etý sııaqty óz jumysynyń basym baǵyttary boıynsha eleýli tabystarǵa jetti.
Kásibı mereke qarsańynda Bas Prokýratýranyń zaman talabyna saı jańa ǵımaratqa qadam basqan qýanyshy qutty bolsyn. Bul - zańnyń ústemdigin jáne onyń múltiksiz saqtalýyn qamtamasyz etýshi jetekshi quqyq qorǵaýshy organ - Qazaqstan prokýratýrasyna memleket pen Memleket basshysynyń úzdiksiz kóńil bólip kele jatqanynyń jarqyn dáleli. Prokýratýra organdarynyń barlyq qyzmetkerleriniń zańdylyq pen quqyqtyq tártipti kúsheıtý jónindegi jaýapty mindetti oryndaýdaǵy jasampaz eńbekterine úlken tabystar tileımin.
Zańdylyqty qorǵaý jolyndaǵy qyzmetterińiz árqashan jemisti bolsyn», - dp jazady Qaırat Mámı.
