Senat spıkeri eldegi ekologııalyq máselelerge qatysty pikir bildirdi
NUR-SULTAN. QazAqparat - Parlament Senatynyń spıkeri Darıǵa Nazarbaeva ekologııalyq tosyn jaǵdaılarǵa qatysty pikir bildirdi, dep habarlaıdy QazAqparat tilshisi.
«Búgingi kúni qoǵamdy asa tolǵandyryp otyrǵan birneshe ekologııalyq tosyn jaǵdaılarǵa Úkimettiń nazaryn aýdarǵym keledi. Ózderińizge málim, ótken jyldyń sońynda Jaıyq ózeninde balyqtyń jappaı qyrylýy oryn alǵan bolatyn. Bul tótenshe jaǵdaıdyń mán-jaıyn anyqtaý úshin arnaıy vedomstvoaralyq komıssııa qurylyp, tekserý sharalary júrgizilip jatyr. Nátıjesinde, qylmystyq is qozǵaldy. Degenmen, balyqtyń jappaı qyrylýynyń naqty sebepterin jáne qorshaǵan ortaǵa keltirilgen zalaldy anyqtap, osy tótenshe jaǵdaıdy qalypqa keltirý boıynsha júrgizilip jatqan jumystar jóninde jurtshylyqty keńinen ári ashyq túrde habardar etýge aıryqsha mán berilýi qajet», - D. Nazarbaeva Senattyń jalpy otyrysynda.
Sonymen qatar ol naýryz aıynda Mańǵystaý oblysyndaǵy «Qalamqas» ken ornyndaǵy órt máselesine de toqtaldy.
«Ekologııalyq máselelerge jaýapty memlekettik organdardyń qorshaǵan ortaǵa jáne turǵyndarǵa áser etetin eshqandaı ahýal joq degen resmı málimdemelerine qaramastan, bul apatty jaǵdaıǵa naqty baǵa berilýi tıis. Aýanyń, ilespe sýdyń jáne topyraqtyń sapasyna kúndelikti tekseris júrgizý kerek. Bul másele Memleket basshysynyń jeke baqylaýynda. Sondyqtan osy ekologııalyq máselelerdi eńserý boıynsha jedel sharalar qabyldaý qajettigine Úkimettiń nazaryn aýdaramyn. Qajet bolǵan jaǵdaıda osy salaǵa qatysty zańnamaǵa tıisti túzetýler engizý jumystaryn qolǵa alǵan jón», - dedi ol.
Osy oraıda D. Nazarbaeva elimizdegi kıiktiń máselesine de erekshe nazar aýdarý qajettigin atap ótti.
«Byltyr Senatta ekologııalyq máseleler qaralyp, birqatar usynysty Úkimetke joldadyq. Bul usynystar boıynsha kelgen jaýaptardyń oryndalýy deńgeıine zertteý júrgizilý kerek. Osy taqyrypty Senat otyrysynyń birinde qaraý kerek dep oılaımyn», - dedi Senat spıkeri.
