Senat spıkeri: «Ózger nemese ól» urany buryn-sońdy bolmaǵan ózektilikke ıe

ASTANA. KAZINFORM — Úshinshi jyl qatarynan jahandyq sheteldik ınvestıtsııalardyń kúrt tómendeýi baıqalady. Mundaı derekti Senat tóraǵasy Máýlen Áshimbaev «Vremıa» gazetinde jarııalanǵan maqalasynda keltiredi.

— Búginde jetekshi elder azdy-kópti qalpyna keldi jáne ınflıatsııa baqylaýǵa alyndy. Biraq, jaǵdaıdy álemdik naryqtardyń turaqsyzdyǵy kúrdelendiredi jáne kóptegen el protektsıonızm saıasatyn kóbirek ustanady. Donald Tramptyń saılaýaldy ýádeleriniń biri kórshiles, sonymen qatar ózge de elderge qatysty saýda baj salyǵyn engizý ekenin eskere otyryp, aldaǵy kezeńde saýda soǵystarynyń kúsheıýin kútýge bolady. Bul baǵytta alǵashqy qadam qazirdiń ózinde jasaldy, — dedi Senat spıkeri.

Onyń atap ótýinshe, ınvestıtsııa úshin kúres kúsheıip keledi. Úshinshi jyl qatarynan jahandyq sheteldik ınvestıtsııalardyń kúrt tómendeýi baıqalady. Ótken jyly Ortalyq Azııaǵa tikeleı ınvestıtsııalardyń quldyraýy 39 paıyzdy qurady. Dúnıejúzilik bank jyl saıynǵy jahandyq ósimdi 2,7 paıyz deńgeıinde boljam otyr. Bul rette saýda geosaıası bloktardyń emes, olardyń ishinde kóbirek oryn almaq.

— Elimiz jahandyq ekonomıkalyq júıeniń bóligi retinde onyń syn-qaterlerine beıimdelý qajettiligimen betpe-bet kelip otyr. Qazir eń tanymal «ózger nemese ól» urany buryn-sońdy bolmaǵan ózektilikke ıe. Bizde qarqyndy alǵa jyljýdan basqa amal joq. Búginde, jańa tehnologııalyq qurylystyń rólin birneshe ese arttyrý, jahandyq aýqymda ınnovatsııalardy, tsıfrlandyrýdy jáne jasandy ıntellektini qarqyndy damytý dáýirinde ekonomıkamyzdyń turaqty jáne ınklıýzıvti ósýin qamtamasyz etý úshin jańa tásilder ómirlik mańyzǵa ıe, — dedi Máýlen Áshimbaev.

Buǵan deıin Senat tóraǵasy Birikken Ulttar Uıymynyń Ulttar lıgasy taǵdyryn qaıtalaý qaýpi bar ekendigin bildirgen edi.