Senat spıkeri: Qasıetti kitapty órteý – halyqtar men dinder arasyndaǵy dushpandyqty qozdyratyn vandalızm
Qasıetti kitaptardy órteý, dinı rámizderdi qorlaý – halyqtar men dinder arasyndaǵy dushpandyqty qozdyratyn vandalızm. Bul týraly Álemdik jáne dástúrli dinder kóshbasshylary sezi hatshylyǵynyń HHІ otyrysynda Senat tóraǵasy Máýlen Áshimbaev aıtty, dep habarlaıdy Kazinform tilshisi.
«Qazirgi tańda arandatýshylardyń ózderiniń teris pıǵyly úshin dinge senýshilerdiń dinı nanym-senimine manıpýlıatsııa jasaýy úlken alańdaýshylyq týdyrady. Qasıetti kitaptardy órteý, dinı rámizderdi qorlaý – halyqtar men dinder arasyndaǵy dushpandyqty qozdyratyn vandalızm. Qazaqstan Prezıdenti BUU Bas assambleıasynyń sessııasynda aıtqandaı, mundaı jol berýge bolmaıtyn ári taǵylyq áreketterden sóz bostandyǵynyń nyshany bilinbeıdi», – dedi Máýlen Áshimbaev.
Onyń atap ótýinshe, halyqaralyq shıelenistiń órshý jaǵdaıynda jahandyq dıalog pen senimdi nyǵaıtatyn jańa ádister tabýdyń ómirlik mańyzy bar.
«Qazirgi álemdegi problemalardyń basym bóligine adamgershilik daǵdarys negiz bolyp otyrǵany aıqyn. Materıaldyq ıgilik, tabıǵat pen qorshaǵan adamdarǵa tutynýshylyq qarym-qatynas izine túsý, adamgershilik basymdyqtarynyń quldyraýy adamzat qoǵamyna teris yqpalyn tıgizedi. Mundaı jaǵdaıda irgeli jáne adamgershilik qundylyqtarynyń qorǵaýshysy retindegi álemdik jáne dástúrli dinderdiń róli zor mańyzǵa ıe», - dedi Senat tóraǵasy.
