Senat «Soıýz-2» zymyrandaryn ushyrý jónindegi kelisimdi ratıfıkatsııalaý týraly zań jobasyn qabyldady
Senat otyrysynda Májilis maquldaǵan «Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy polıar mańyndaǵy orbıtalarǵa soltústik baǵytta ǵarysh apparattaryn ushyrý úshin «Baıqońyr» ǵarysh aılaǵynan «Soıýz-2» tıpindegi tasymaldaǵysh zymyrandardy ushyrýdy júzege asyrý jónindegi yntymaqtastyq týraly kelisimdi ratıfıkatsııalaý týraly» Qazaqstan Respýblıkasy Zańynyń jobasy qaraldy.
Zań jobasyn tanystyrǵan Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın Qazaqstan aýmaǵynan «Soıýz-2» tıpindegi tasymaldaǵysh zymyrandardy ushyrǵany úshin qandaı tólem alynatynyn túsindirdi.
«Qazaqstan Respýblıkasy Parlamentiniń Májilisi maquldaǵan «Qazaqstan Respýblıkasynyń Úkimeti men Reseı Federatsııasynyń Úkimeti arasyndaǵy polıar mańyndaǵy orbıtalarǵa soltústik baǵytta ǵarysh apparattaryn ushyrý úshin «Baıqońyr» ǵarysh aılaǵynan «Soıýz-2» tıpindegi tasymaldaǵysh zymyrandardy ushyrýdy júzege asyrý jónindegi yntymaqtastyq týraly kelisimge 2019 jylǵy 20 maýsymda Nur-Sultan qalasynda qol qoıyldy. Osy kelisim búkil álemdi keńjolaqty ınternetpen qamtamasyz etýge baǵyttalǵan OneWeb halyqaralyq jobasyn júzege asyrý úshin «Baıqońyr» ǵarysh aılaǵynan ǵarysh apparattaryn ushyrý negizinde Qostanaı oblysynyń aýmaǵynda «Soıýz-2» tıpindegi tasymaldaǵysh zymyrandardyń bólinetin bólikteriniń qulaý aýdanyn Reseı tarapynan paıdalaný tártibin retteıdi. Qulaý aýdanyn paıdalaný úshin Qostanaı oblysynyń Jangeldi aýdany ákimshiligine túsetin jylyna 3 ret ushyrý úshin 460 myń dollar kóleminde tólemaqy anyqtalǵan. Al qosymsha ushyrý bolǵan jaǵdaıda árbir ushyrý úshin 50 myń dollar kóleminde tólemaqy tólenetin bolady. Qulaý aýdany jylyna nebári birneshe ret servıtýt shartyna saı qoldanylyp otyrady», - dedi mınıstr.
Sondaı-aq, ol atalǵan zymyran bólshekteriniń qaı óńirge qulaıtynyn, jergilikti turǵyndardyń qaýipsizdigi qalaı qamatamsyz etiletinin baıandady.
«3-6 táýlikti quraıtyn bul kezeńderde adamdar men úı malynyń qaýpsizdigin qamtamasyz etý úshin qulaý aýdanyna kirý jabyq bolady. Qalǵan ýaqytta qulaý aýdanynda júrýge jáne ony jaıylym retinde paıdalanýǵa shekteý qoıylmaıdy. Adamdardyń qulaý aýdanynan tysqary jerlerde turýy qaýipsiz bolyp tabylady. Sonymen qatar tasymaldaǵysh zymyrandardy árbir ushyrǵan saıyn jaqyn mańdaǵy tirshilik ortasyna gıgıenalyq baǵa berý jumystary júrgizilip, synamalary alynatyn bolady», - deıdi Baǵdat Mýsın.
Vedomstvo basshysy kıik tóldeıtin ýaqytta Baıqońyrdan atalǵan zymyrandardyń ushýyna shekteý qoılatynyn da eske saldy.
«Qulaý aýdanyn paıdalaný kezinde janýarlar men ósimdikter álemine jyl saıyn monıtorıng júrgizý kózdelýde. Tabıǵat qorǵaý uıymdarynyń kıikterdiń tóldeý jáne qustardyń uıa salý kezeńinde qulaý aýdanyn paıdalanýdy sheteý týraly talaptary oryndalady. ıAǵnı, sáýir men maýsym aılary aralyǵynda tasymaldaǵysh zymyrandar ushyrylmaıdy», - dedi mınıstr.
