Senat Sot júıesi men sýdıalardyń mártebesi jónindegi Konstıtýtsııalyq zań jobasyn Májiliske qaıtardy
ASTANA. 10 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Qazaqstan Respýblıkasynyń Sot júıesi men sýdıalardyń mártebesi týraly QR Konstıtýtsııalyq Zańyna ózgerister men tolyqtyrýlar engizý týraly» zań jobasyn qarap shyǵyp, qujatty birqatar ózgerister engizip Májiliske qaıtardy.
Atalǵan joba elimizdiń sot júıesin jetildirý maqsatynda ázirlengen jáne QR Prezıdentiniń quqyq qorǵaý qyzmeti men sot júıesininiń tıimdiligin arttyrý týraly Jarlyǵyn júzege asyrýǵa baǵyttalady. Toqtala ketetin jaıt, eldegi reformaǵa sáıkes QR Joǵarǵy sotynyń janyndaǵy Sot ákimshiligi jónindegi komıtet taratylatyny belgili. Osyǵan oraı zań jobasynda sot qyzmetin uıymdastyrýshylyq, materıaldyq-tehnıkalyq qamtamasyz etý normalary qamtylyp otyr. Sondaı-aq zań jobasymen Joǵarǵy sottyń tóraǵasyna, aýdandyq jáne oblystyq sottardy qurý, qaıta uıymdastyrý jáne taratý týraly usynystardy QR Prezıdentine usyný jónindegi ókilettik beriledi. Qujat boıynsha sýdıanyń ornynan túsý nysanynda qyzmetinen bosatý úshin qosymsha talaptar kózdeledi jáne sýdıanyń ornynan túsýin toqtata turý ınstıtýty engiziledi. Talqylaý barysynda senatorlar Májilis maquldaǵan zań jobasyna birqatar tolyqtyrýlar engizdi. Atap aıtsaq, zań jobasynda Joǵarǵy sottyń jalpy otyrysynyń ókilettikteri kózdeletin arnaıy norma bekitilgen. Senatorlar atalǵan normany zańdylyqty udaıy buzýǵa jol bergen sýdıaǵa qatysty talqylaýdy kózdeıtin túzetýler engizýdi usynyp otyr. Bul túzetýler sybaılas jemqorlyq kórinisterin boldyrmaý, sondaı-aq sot tóreligin iske asyrý kezindegi sýdıanyń táýelsizdigi prıntsıpteri saqtalýyn qamtamasyz etý maqsatynda engiziledi.
Budan bólek, senatorlar jasaǵan túzetýge sáıkes sot isterin qaraý kezinde zańdylyqty buzýǵa jol bergen materıaldardy Sot jıýrıine berý týraly norma qamtylyp otyr.
