Senat sot tóreligine qoljetimdilikti qamtamasyz etetin zań jobasyn qabyldady
ASTANA. 19 qańtar. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine isterdi qaraýdyń apellıatsııalyq,
kassatsııalyq jáne qadaǵalaý tártibin jetildirý, senim deńgeıin arttyrý jáne sot tóreligine qoljetimdilikti qamtamasyz etý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda talqylandy. Senat zań jobasyna birqatar ózgerister engizip, qabyldady.
Esterińizge sala keteıik, zań jobasymen isterdi qaraýdyń apellıatsııalyq, kassatsııalyq jáne qadaǵalaý tártibin jetildirý usynylady. Atap aıtqanda, isterdiń árbir sot satysynda mindetti túrde kezeń-kezeńimen ótýi kózdelip otyr. Bul rette bir jáne sol sottyń (oblystyq) aıasynda eki saty saqtalady (apellıatsııalyq, kassatsııalyq). Apellıatsııalyq satydaǵy sot isti mán boıynsha qaraıdy, onyń isti birinshi satydaǵy sotqa qaraýǵa jiberý quqyǵy alyp tastalady. Kassatsııalyq satydaǵy sot zańdy kúshine engen sot aktilerin olar apellıatsııalyq tártippen qaıta qaralǵannan keıin ǵana qaraıtyn bolady. Qadaǵalaý satysyndaǵy sot ta (Joǵarǵy Sot) zańdy kúshine engen sot aktilerin qaraıdy, biraq olar kassatsııalyq tártippen qaıta qaralǵan soń ǵana qaralady.
Ekinshi oqylym barysynda senatorlar birqatar ózgertýler usynǵan bolatyn. Atap aıtqanda, zań jobasynyń is júrgizý zańnamasyn jetildirýge baǵyttalǵan normalary tujyrymdamaǵa sáıkes keltirildi.
Atap aıtqanda, jábirlenýshiniń quqyqtaryn qorǵaý, oblystyq jáne oǵan teńestirilgen sottyń sottaýyna jatatyn ister, appellıatsııalyq shaǵymdar jasaý, narazylyqtar keltirý tártibi baǵytynda túzetýler jasaldy. Budan bólek, sýdıa jeke qaraıtyn qylmystar quramdarynyń tizbesin naqtylaýǵa baǵyttalǵan ózgerister men tolyqtyrýlar eskerilmegen. Senatorlar bul kemshilikti joıýdy usyndy. Sýdıany qylmystyq isti qaraýǵa qatystyrmaıtyn negizderdi naqtylaý maqsatynda túzetýler de engizildi. «Alaıda, sýdıa óziniń qatysýymen shyǵarylǵan úkimniń nemese isti toqtatý týraly qaýlynyń kúshi joıylǵan jaǵdaıda, isti alqabılerdiń qatysýymen jańadan qaraýǵa qatysa almaıtyndyǵy eskerilmegen. Bul olqylyqtyń ornyn toltyrý usynylady», - delingen zań jobasy boıynsha Bas komıtettiń qorytyndysynda.
