Senat sot tóreligin iske asyrýdy jeńildetýge baǵyttalǵan zań jobasyn Májiliske qaıtardy
ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine sot tóreligin iske asyrýdy odan ári jeńildetý, tóreshildik rásimderdi azaıtý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda talqylandy.
Qujatqa birqatar ózgerister engendikten, zań jobasy Májiliske qaıtaryldy.
Zań jobasy azamattar men zańdy tulǵalardyń buzylǵan quqyqtaryn tıimdi ári der kezinde qorǵaýǵa baǵyttalady. Bul rette zań jobasynda buıryq arqyly is júrgizý salasynyń keıbir daýlaryn zańdy talap qoıý salasyna berý arqyly keńeıtiledi. Sonymen qatar Azamattyq is júrgizý kodeksinde bitimgershilik, tatýlasý kelisimin jasasý rásimin egjeı-tegjeıli reglamentteý normalary da qarastyrylyp otyr.
Daýdy beıbit jolmen sheshýge talaptardy yntalandyrý maqsatynda bitimgershilik kelisim jasasý memlekettik bajdy qaıtarý úshin negiz bolatyn tizbege engiziledi. Budan bólek, daýdy mindetti túrde aldyn ala sotqa deıingi tártippen sheshetin ister tizbesin bekitý jáne keńeıtý kózdelip otyr. Sondaı-aq zań jobasymen sot rásimderin jeńildetý boıynsha qosymsha sharalar retinde beınebaılanys quraldarynyń kómegimen dáleldemelerdi qashyqtyqtan zertteý jáne iske qatysatyn tulǵalardyń túsiniktemelerin tyńdaý múmkindigi kózdeledi.
Toqtala ketetin jaıt, talqylaý barysynda Senat Májilis maquldaǵan zań jobasyna birqatar túzetý engizdi. Atap aıtqanda, azamattyq is júrgizý boıynsha sot otyrystarynyń barysyn aýdıo-beıne jazbalar arqyly hattaý, sot oryndaýshynyń sanktsııalar berý úderisin avtomattandyrý sekildi baǵytta túzetý ler usynylǵan.
Qujatqa engizilgen ózgerister Májiliste talqylanatyn bolady.
