Senat sot reformalaryn zańnamalyq qoldaýdy qamtamasyz etedi
NUR-SULTAN. QazAqparat - Búgin Senatta sot júıesi týraly zańnamany odan ári jetildirý máseleleri talqylandy. Konstıtýtsııalyq zańnama, sot júıesi jáne quqyq qorǵaý organdary komıtetiniń otyrysyna Joǵarǵy sottyń basshylyǵy men sýdıalary da qatysty, dep habarlaıdy QazAqparat.
Elimizdiń Prezıdenti Qasym-Jomart Toqaev osy salada júrgizilip jatqan reformalardyń negizgi basymdyqtaryn belgilegen bolatyn. Depýtattardyń zań shyǵarý bastamalarynyń negizi sol basymdyqtardan bastaý alady.
«Sot júıesin reformalaýdy tıimdi júrgizý maqsatynda Parlament sot qurylysyn jańǵyrtýǵa, sot tóreliginiń ashyqtyǵy men aıqyndyǵyn, sot isterin qaraýdyń tıimdiligi men sapasyn arttyrýǵa baǵyttalǵan birqatar zańdar qabyldady. Búgingi shara sot júıesin reformalaýdy zańnamalyq turǵyda qamtamasyz etý jáne Memleket basshysynyń Joldaýynan týyndaıtyn mindetterdi sheshýdegi Senat júrgizip jatqan jumystardyń zańdy jalǵasy bolyp tabylady», - dep atap ótti komıtet tóraǵasy Vladımır Volkov.
Otyrysta Joǵarǵy Sot Tóraǵasy Jaqyp Asanov júrgizilip jatqan jumystar týraly óz pikirimen bólisti. Ol qazir elimizdiń sot júıesinde halyq senimin arttyrýǵa jáne azamattardyń sot tóreligine, sondaı-aq quqyq ústemdigine qol jetkizýin qamtamasyz etýge baǵyttalǵan basym jobalardy iske asyrý jalǵasyp kele jatqanyn atap ótti. Júrgizilip jatqan reformalardy senatorlar tarapynan ýaqtyly zańnamalyq qoldaýdyń da mańyzy zor bolyp otyr.
«Sońǵy jyldary sot isin júrgizý men sot júıesin jańǵyrtýǵa baǵyttalǵan birqatar júıeli sharalar qabyldandy. Depýtattardyń qoldaýynyń arqasynda aǵymdaǵy jyldyń 11 naýryzynda sot júıesin jańǵyrtý boıynsha túzetýler qabyldandy. Jumys odan ári jalǵasyp keledi», - dedi Jaqyp Asanov.
Komıtet tóraǵasy Vladımır Volkov kezdesýdi qorytyndylaı kelip, sot bıliginiń táýelsizdigin nyǵaıtý jónindegi Prezıdenttiń tapsyrmalaryn oryndaý jolynda komıtet aldaǵy ýaqytta da kúsh-jigerin aıamaıtynyn atap ótti.
