Senat Sot prıstavtary týraly zańǵa engizilgen ózgeristerdi qabyldady
ASTANA. 10 jeltoqsan. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «Sot prıstavtary týraly QR Zańyna ózgerister engizý týraly» QR Zańyn qabyldady. Qujat Memleket basshysynyń qol qoıýyna jiberiledi.
Atalǵan zań Memleket basshysynyń quqyq qorǵaý qyzmeti men sot júıesiniń tıimdiligin arttyrý jónindegi Jarlyǵyn oryndaý maqsatynda ázirlengen. Oǵan sáıkes Ádilet mınıstrligine - atqarýshylyq qujattardy oryndaý, jekelegen negizdemeler boıynsha respýblıkalyq menshikke aınaldyrylǵan múlikti esepke alý, saqtaý, baǵalaý jáne odan ári paıdalaný jumystaryn uıymdastyrý fýnktsııasy beriledi. Al Joǵarǵy sottyń janynan jańadan uıymdastyrylǵan sottar qyzmetin qamtamasyz etý departamentine - oblystyq, aýdandyq jáne olarǵa teńestirilgen sottardyń qyzmetin uıymdastyrýshylyq materıaldyq-tehnıkalyq jáne ózge de qamtamasyz etý fýnktsııalary beriledi.
Budan bólek, atalǵan departamentke sot prıstavtarynyń qyzmetine ádistemelik basshylyq jasaý fýnktsııalary men ókilettikteri júkteledi. Al Joǵarǵy sottyń janyndaǵy Sot ákimshiligi jónindegi komıtet taratylady. Zańǵa sáıkes sot prıstavtary bólimshelerin Joǵarǵy sottyń, jergilikti jáne basqa sottardyń qyzmetin uıymdastyrýshylyq, materıaldyq-tehnıkalyq qamtamasyz etý jónindegi ýákiletti organ qurady. Budan bólek, sot prıstavtarynyń qyzmetine basshylyq jasaýdy ýákiletti organ jáne onyń aýmaqtyq bólimsheleri júzege asyrady.
