Senat «shóptik mıksterdi» satýǵa tyıym salatyn jobany Májiliske qaıtardy
ANA. 7 sáýir. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda senatorlar «Esirtki, psıhotroptyq zattar,
prekýrsorlar jáne olardyń zańsyz aınalymy men teris paıdalanylýyna qarsy is-qımyl sharalary týraly» zań jobasyn talqylap, qujatqa túzetý engizilýine baılanysty ony Májiliske qaıtardy.
Esterińizge sala keteıik, atalǵan zań jobasyna Májilis depýtattary bastamashylyq jasaǵan bolatyn. «Esirtkini paıdalanýdyń jasóspirimder arasynda keńinen taralýy qoǵamnyń úlken alańdaýshylyǵyn týdyryp otyr. Qoǵam men áleýmet bul úderiske óz yqpalyn kúsheıtýleri tıis. Elimizde halyq densaýlyǵyna keri áser etetin «shóptik mıkster» búginge deıin erkin satylyp keldi. Bulardyń esirtkimen áseri birdeı. Ótken jyldyń 20 qańtarynda elimizdiń Bas sanıtarynyń qaýlysy boıynsha «shóptik mıksterdi» satýǵa tyıym salyndy. Alaıda, tyıym salý sharasyn buzǵan azamattarǵa tıisti ákimshilik nemese qylmystyq jaýapkershilik qarastyrylmaǵan», - deıdi zań jobasyna bastamashy bolǵan depýtat Berik Bekjanov. Onyń aıtýynsha, zań jobasyn qabyldaý qosymsha qarjylyq-ekonomıkalyq shyǵyndarǵa soqtyrmaıdy.
Senatorlar zań jobasyna qatysty jalǵyz túzetý jasap, Májiliske qaıtardy. Buǵan sáıkes, atalmysh zań alǵashqy resmı jarııalanǵan kezden bastap emes, on kún merzim ótkennen keıin qoldanysqa enetin bolady.
