Senat shildede taratylǵannan keıin depýtattar qandaı qyzmetke barady

ASTANA. KAZINFORM – Jalpyhalyqtyq referendýmǵa shyǵarylǵan jańa Konstıtýtsııa jobasy qabyldanǵan jaǵdaıda, Senat 1 shildede taratylady. Bul týraly Senat tóraǵasy Máýlen Áshimbaev málim etti.

- Aýqymdy Konstıtýtsııalyq ózgerister nátıjesinde, bir palataly Parlament qurylmaq. Ótken 30 jylda qos palataly Parlament óziniń mıssııasyn oryndady. Eger halqymyz jańa Konstıtýtsııa jobasyn (jalpyhalyqtyq referendým) qoldasa, onda bir palataly Parlament qalyptasady. 1 shildeden jańa Konstıtýtsııa kúshine ense, Senat taratylady, - dedi M. Áshimbaev palatanyń jalpy otyrysynan keıin tilshiler suraǵyna jaýap bere otyryp.

Sonymen qatar ol palata taraǵannan keıin senatorlar ary qaraı eldiń múddesine qyzmet ete beretinin aıtty.

- Qazir Senattaǵy depýtattardyń tájirıbesi mol. Ortalyqta jáne óńirlerde biraz laýazymdy qyzmette bolǵan. Sondyqtan áriptesterimiz ary qaraı elimizdiń damýyna óz úlesin qosatyn bolady, - dedi Senat tóraǵasy.

Atap aıtqanda, Memleket basshysy 2026 jylǵy 15 naýryzda respýblıkalyq referendým ótkizý týraly Jarlyqqa qol qoıdy. 

Jalpyhalyqtyq referendýmǵa shyǵarylǵan jańa Konstıtýtsııa jobasy qabyldanǵan jaǵdaıda, Ata zańnyń naqty qashan kúshine enetini anyq jazylǵan.

Naqtyraq aıtqanda, respýblıkalyq basylymdardy jarııalanǵan jańa Konstıtýtsııa jobasynyń 95-babynda 1995 jylǵy 30 tamyzdaǵy Qazaqstan Respýblıkasynyń Konstıtýtsııasyna sáıkes qalyptastyrylǵan Qazaqstan Respýblıkasynyń Parlamenti óz ókilettigin 2026 jylǵy 1 shildeden bastap toqtatatyny jazylǵan. Al Konstıtýtsııa kúshine engen kúnnen bastap bir aı ishinde Qazaqstan Respýblıkasynyń Prezıdenti Quryltaı saılaýyn jarııalaıdy jáne ol eki aı ishinde ótkiziledi.