Senat shekara arqyly júkterdi ótkizýdi jedeldetýge baǵyttalǵan qujatty Májiliske qaıtardy

ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine Keden odaǵynyń kedendik shekarasy arqyly avtomobıl ótkizý pýnktterinde veterınarlyq-sanıtarııalyq baqylaý jáne ósimdikter karantıni boıynsha baqylaý fýnktsııalaryn keden organdaryna berý máseleleri boıynsha ózgerister men tolyqtyrýlar engizý týraly» zań jobasyn eki oqylym boıynsha talqylady. Qujatqa birqatar túzetý engendikten, zań jobasy Parlament Májilisine qaıtaryldy.

Zań jobasy Keden odaǵynyń kedendik shekarasy arqyly avtomobıl ótkizý pýnkterinde ákimshilik kedergilerdi joıý, baqylaýshy organdardyń sanyn qysqartý, sonymen qatar Keden odaǵynyń shekarasyndaǵy ótkizý pýnktteri arqyly júkterdi ótkizýdi jedeldetýdi qarastyrady

«Búgingi kúni keden organdaryna kóliktik jáne sanıtarlyq-epıdemıologııalyq baqylaý túrlerin júrgizý boıynsha fýnktsııalar berilgen. Al Jeneva konventsııasyna sáıkes, baqylaýdyń barlyq túrlerin uıymdastyrý keden qyzmetimen úılestiriledi jáne olardyń ýákileti berilgen jaǵdaıda baqylaý fýnktsııalaryn júrgizedi. Sondyqtan da, zań jobasyna sáıkes avtomobıl ótkizý pýnktterinde keden organdaryna veterınarlyq jáne fıtosanıtarlyq baqylaý boıynsha qujattamalyq jáne fızıkalyq baqylaý júrgizý fýnktsııalary beriledi»,- dedi QR Qarjy mınıstri Baqyt Sultanov.

Mınıstrdiń sózine qaraǵanda, qujatty qabyldaý shekara arqyly kólik quraldarynyń ótý ýaqytyn 3-4 saǵatqa deıin qysqartyp, shekaradaǵy jemqorlyqtyń tómendeýine jol ashady. Budan bólek, qujatta elimizdiń ishindegi veterınarlyq jáne fıtosanıtarlyq baqylaý jáne qadaǵalaýdy ońtaılandyrýǵa sebep bolady.

Senatorlar barlyǵy 28 túzetý engizdi. Olardyń basym bóligi redaktsııalyq naqtylaý sıpatynda bolyp tabylady.