Senat «shartty túrde qarjylandyrylatyn shyǵystar» týraly qujatty birinshi oqylymda maquldady
ASTANA. 1 qarasha. QazAqparat - Búgin Parlament Senatynyń jalpy otyrysynda palata depýtattary
«Qazaqstan Respýblıkasynyń Bıýdjet kodeksine ózgerister men tolyqtyrýlar engizý týraly» zań jobasyn birinshi oqylymda maquldady.
Atalǵan zań jobasymen jańa bıýdjettik erejeler engizý kózdeledi. Bul eldiń ekonomıkadaǵy jaǵdaıy ózgergen tusta jedel den qoıýǵa múmkindik berý tetikterin qarastyrady. Atap aıtqanda, birinshi toqsannyń qorytyndylary boıynsha bıýdjet kiristeriniń atqarylýy esepti kezeńge arnalǵan bekitilgen josparly kórsetkishterden asyp túsken jaǵdaıda, sondaı-aq aǵymdaǵy qarjy jylyna arnalǵan áleýmettik-ekonomıkalyq damý parametrleriniń jaqsarýy boljanǵan jaǵdaıda bekitilgen bıýdjettik baǵdarlamalarǵa qosymsha bólinetin «shartty túrde qarjylandyratyn shyǵystar» degen uǵym engizildi.
«Bul shyǵystar 2013 jylǵa arnalǵan respýblıkalyq bıýdjet jobasynda 200 mlrd. teńge shamasynda qarastyrylǵan. Shartty túrde qarastyrylǵan shyǵystardy bólý protsesi qarjy jylynyń birinshi toqsanynda, ekonomıkanyń damýy men bıýdjettiń kiris bóliginiń oryndalýyna táýeldi bolyp tabylady», - deıdi Ekonomıkalyq damý jáne saýda mınıstri Erbolat Dosaev.
Mınıstrdiń aıtýynsha, atalǵan shyǵystar boıynsha jeke bólinetin qarajattyń ákimshisi Qarjy mınıstrligi bolyp tabylady. Shartty túrde qarjylandyrylatyn shyǵystar kólemi respýblıkalyq bıýdjettiń jalpy kóleminiń 4 paıyzynan aspaıtyn mólsherde anyqtalady.
«Bul bıýdjettik bıýaǵdjarlamaǵa qosymsha retinde júzege asady. Osyǵan oraı, bıýdjet qarajatynyń ýaqytyly ıgerilýi, shyǵystardyń áleýmettik baǵdarlanýy, sondaı-aq aǵymdaǵy qarjy jyly qabyldanǵan mindettemelerdi aıaqtaý sharalary eskeriledi», - deıdi mınıstr E. Dosaev. Onyń aıtýynsha, bul tetik bıýdjet sapasyn arttyryp, qarajattardyń ıgerilýine naqty jaǵdaı jasaıdy.
