Senat Semeı ıadrolyq qaýipsizdik aımaǵy týraly zańdy maquldady
Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń málimetine qaraǵanda, qujattaǵy normalar burynǵy Semeı ıadrolyq synaq polıgony men oǵan irgeles jatqan jerlerdiń aýmaǵyndaǵy radıatsııalyq jáne ekologııalyq qaýipsizdik deńgeıin qamtamasyz etedi. Onyń ishinde, eldiń ǵylymı áleýetin damytý boıynsha memlekettik baqylaýdy kúsheıtýde, ıadrolyq energııany beıbit maqsatta paıdalanýda jáne basqa da baǵyttarda Qazaqstannyń ustanymyn nyǵaıtý eskerilgen.
Zańda mynalar:
- keshendi ekologııalyq zertteý jáne memlekettik ekologııalyq saraptama nátıjeleriniń negizinde Semeı ıadrolyq synaq polıgonynyń normatıvten tys lastanǵan ýchaskelerinde Semeı ıadrolyq qaýipsizdik aımaǵyn (SıAQA) qurý;
- SıAQA aýmaǵynda ıadrolyq jáne radıatsııalyq qaýipsizdikti qamtamasyz etý;
- SıAQA jerlerin vedomstvolyq baǵynysty uıymnyń jer paıdalanýyna berý;
- vedomstvolyq baǵynysty uıymǵa SıAQA qaýipsizdigin qamtamasyz etý, áleýetin damytý jónindegi negizgi mindetterdi júkteý eskerilgen.
«Zańdy iske asyrý 2027 jylǵa deıin respýblıkalyq bıýdjetten 3 mlrd 596 mln teńge somasynda qosymsha qarjy shyǵyndaryn talap etedi. Shyǵyndar respýblıkalyq bıýdjet komıssııasynda qoldaý tapty», - delingen Senat komıtetininiń málimetinde.
Semeı ıadrolyq qaýipsizdik aımaǵyn qurý jerdi paıdalaný máselelerinde memlekettik baqylaýdy kúsheıtedi, aýmaqty ońaltýdy, radıoekologııalyq monıtorıngti uıymdastyrýdy jáne eldiń ǵylymı áleýetin damytýdy qamtamasyz etedi. Ýákiletti uıym – QR Energetıka mınıstrliginiń Ulttyq ıadrolyq ortalyǵyna fýnktsııalardy zańnamalyq turǵyda berý asa mańyzdy bolyp otyr.
«Zańdy qabyldaýdaǵy mańyzdylyǵyna toqtalsaq, ony júzege asyrý nátıjesinde ıadrolyq synaq polıgonynyń radıoaktıvti lastanǵan aýmaqtary men lastanbaǵan jerleri ajyratylady. Lastanbaǵan alqapty aýyl sharýashylyǵyna arnalǵan jerlerdiń sanatyna engizýge bolady. Bul turǵyda 1 mln gektar jer eskerilgen», - dedi senator Olga Býlavkına.
