Senat saılaýynda respýblıka boıynsha tańdaýshylardyń kelýi 98,7 paıyzdy qurady - Q.Turǵanqulov
ASTANA. QazAqparat - Senat saılaýynda jalpy respýblıka boıynsha tańdaýshylardyń kelýi 98,7 paıyzdy qurady. Bul týraly búgin Astanada QR Ortalyq saılaý komıssııasynyń tóraǵasy Qýandyq Turǵanqulov málim etti.
QR OSK tóraǵasynyń sózine qaraǵanda, QR Úkimeti men jergilikti atqarýshy organdar Memleket basshysynyń saılaýdy uıymdastyrýshylyq, qarjylyq jáne materıaldyq-tehnıkalyq qamtamasyz etý jónindegi tapsyrmalaryn ýaqtyly iske asyrdy. Aýmaqtyq saılaý komıssııalary barlyq qajetti uıymdastyrýshylyq is-sharalardy Ortsaılaýkom bekitken kúntizbelik josparǵa sáıkes, saılaý zańnamasy belgilegen barlyq rásimderdi saqtaı otyryp ótkizdi.
Aıta keteıik, elektorattyq naýqan barysynda barlyǵy 88 úmitker usynyldy. Jasyryn daýys berýge arnalǵan bıýlletenderge 39 kandıdattyń tegi engizildi. Jalpy respýblıka boıynsha tańdaýshylardyń kelýi 98,7 paıyzdy qurady. Bul rette Mańǵystaý oblysy men Astana qalasynda olardyń kelýi júz paıyz boldy. Alty óńirde kelý 99 paıyzdan asty. Tizimderge engizilgen 3279 tańdaýshynyń 3236-sy nemese tańdaýshylardyń jalpy sanynyń 98,69 paıyzy daýys berýge qatysty.
Tikeleı daýys berý barysy men daýystardy sanaý rásimin kandıdattardyń senim bildirgen adamdaryn, Qazaqstan Respýblıkasy saıası partııalarynyń, qoǵamdyq birlestikteri men buqaralyq aqparat quraldarynyń ókilderin qosa alǵanda, jalpy 387 adam baıqady.
«Baıqaýshylardyń aldyn ala baǵalaýyna sáıkes saılaý naýqany uıymdasqan túrde, ashyq jáne demokratııalyq jaǵdaıda ótti. Saılaý protsesiniń barlyq qatysýshylary quqyqtyq keńistik sheńberinde jáne elimizdiń saılaý zańnamasy belgilegen rásimderge sáıkes áreket etti», - delingen OSK málimetinde.
Budan buryn habarlanǵandaı, QR OSK saılaý qorytyndylaryn jarııalap, Senatqa 16 depýtat saılandy.
Aıta keteıik, kúntizbelik josparǵa sáıkes, 29 qyrkúıekte saǵat 24.00-de úmitkerlerdiń saılaýaldy úgit-nasıhat jumystary aıaqtaldy. Úgit-nasıhat sharasynyń aıasynda saılaýshylarmen 11-29 qyrkúıek aralyǵynda aımaqtarda 266 kezdesý ótti. 30 qyrkúıekte, sonymen birge daýys berý kúni - 1 qazanda kez kelgen saılaýaldy úgit-nasıhatqa tyıym salyndy.
Senat depýtattaryn saılaý janama saılaý quqyǵy negizinde jasyryn daýys berý arqyly júzege asady. Janama saılaý quqyǵy Parlament Senaty depýtattarynyń saılaýynda daýys berýge tek qana tańdaýshylar, ıaǵnı máslıhattar depýtattary ǵana qatysady degendi bildiredi.
Osylaısha, óz kezeginde elimizdiń azamattary tikeleı saılaýda saılaǵan máslıhattar depýtattary senatorlardy saılaıdy, al olar Parlamentte óńir jurtshylyǵynyń múddelerin bildiredi.
