Senat saılaýynda Dáýren Ádilbekov 94,5 paıyz daýyspen jeńiske jetti - Aqmola oblysy
KÓKShETAÝ. QazAqparat - Qazaqstan Respýblıkasy Prezıdentiniń Jarlyǵymen 2017 jyldyń 28 maýsymynda Parlament Senatynyń depýtattary saılaýyn ótkizý belgilengen bolatyn.
Osyǵan oraı, búgin Aqmola oblysy máslıhattary depýtattarynyń birlesken otyrysy ótip, máslıhat depýtattarynan quralǵan tańdaýshylar Parlament Senatynyń depýtatyn saılady, dep habarlaıdy «QazAqparat» HAA tilshisi.
Máslıhat depýtattarynyń birlesken otyrysyn ashqan oblystyq máslıhattyń hatshysy Dýlat Nurmoldın zań boıynsha Parlament Senatynyń depýtattyǵyna saılaý máslıhat depýtattarynan quralǵan tańdaýshylardyń quzyryna berilgendigin jáne «Qazaqstan Respýblıkasynyń saılaýy týraly» konstıtýtsııalyq zańynyń 77 babyna saı, bul tańdaýshylardyń birlesken otyrysynda ótetinin aıtty. Oblys máslıhattarynyń 276 depýtaty bolsa, birlesken otyrysqa 271 depýtat kelgen eken. Zań talabyna saı, depýtattardyń elý paıyzdan astamy qatysqan jaǵdaıda ol zańdy bolyp tabylmaq.
Budan keıin oblystyq saılaý komıssııasynyń tóraǵasy Ádilhan Shaıahmetov sóz alyp, depýtattarǵa daýys berý tártibin baıandap berdi. Saılaý bıýlleteni arqyly tańdaýshylar ózi qalaǵan úmitkerdiń teginiń tusyna belgi qoıady. Bir tańdaýshy bir daýys bere alady jáne jaramsyz bolyp qalǵan bıýlletenniń ornyna ekinshisi berilmeıdi.
Aıta ketelik, bıylǵy Parlament Senatynyń depýtaty saılaýyna oblysymyzdan eki úmitker: Dáýren Ádilbekov pen Damır Doshojın qatysqan edi. Saılaýǵa daýys beretin tańdaýshy retinde qatysqan máslıhat depýtattarynan bólek, úmitkerlerdiń senim bildirgen ókilderi jáne baqylaýshylar, buqaralyq aqparat quraldarynyń ókilderi qatysty. Aıta keterligi, baqylaýshylardyń arasynda oblysymyzda tirkelgen túrli saıası partııalardyń ókilderimen birge, sheteldik baqylaýshylar da boldy.
Daýys berýdiń aldyn ala shyǵarylǵan qorytyndysyna saı, depýtattyqtan úmitker Dáýren Ádilbekovke barlyq tańdaýshylardyń 94,5 paıyzy daýys berse, Damır Doshojınge 5,5 paıyzy óz daýystaryn berdi.
