Senat saılaýynan 14 kandıdat shyǵyp qaldy
ASTANA. QazAqparat - QR Parlamenti Senatynyń depýtattaryn saılaýyna tirkelgen 53 kandıdattyń 14-i tirkeý merzimi aıaqtalǵannan keıin, saılaý dodasynan óz ótinishteri boıynsha shyǵyp qaldy. Osylaısha, qazirgi ýaqytta 1 qazanda ótetin saılaýǵa barlyǵy 39 kandıdat tirkelip tur. Bul týraly QR Ortalyq saılaý komıssııasynyń hatshysy Baqyt Meldeshov málim etti.
«Daýys berý kúnine deıingi eki kúnde kandıdatty tirkeý týraly sheshimniń kúshin joıýǵa nemese buǵan deıin tirkeýden shyǵarylǵan kandıdatty qaıta tirkeýge ruqsat etilmeıdi. Osyny eskersek, qalǵan kandıdattardyń barlyǵy aldaǵy saılaýǵa qatysatyn bolady», - deıdi Baqyt Meldeshov.
Onyń sózine qaraǵanda, qazirgi ýaqytta barlyq qajetti qorǵaý dárejeleri bar jasyryn daýys berýge arnalǵan bıýlletender ázirlengen. Saılaý zańnamasyna sáıkes bıýlletender saılaý kúnine bir kún qalǵanda tıisti aýmaqtyq saılaý komıssııalaryna jetkiziledi.
Eske sala keteıik, Parlament Senaty depýtattarynyń saılaýynda daýys berý 2014 jylǵy 1 qazanda tańdaýshylardyń (máslıhattardyń - red.) otyrysynda ótedi. Tańdaýshylardyń birlesken otyrysyna oblystyń barlyq máslıhattarynan ókil bolatyn, saılanǵan depýtattar sanynyń elý paıyzynan astamy qatyssa, ol zańdy dep sanalady. Daýys berý zańdy bolýy úshin tańdaýshylardyń birlesken otyrystaryna tańdaýshylardyń elý paıyzynan astamy daýys berýge qatysýlary tıis. Daýys berýge qatysqan tańdaýshylardyń elý paıyzynan astamynyń daýysyn alǵan kandıdat saılanǵan bolyp sanalady. Al eger daýys berýdiń birinshi týryna ekiden astam kandıdat qatyssa jáne olardyń birde-biri jeńiske qajetti daýystar jınaı almasa, sol kúni basqa kandıdattarmen salystyrǵanda eń kóp daýys jınaǵan eki kandıdattyń arasynda ekinshi týr ótedi. Ekinshi týrda basqa kandıdatqa qaraǵanda daýys berýge qatysqan tańdaýshylardyń daýys kópshiligin alǵan kandıdat jeńiske jetti dep esepteledi.
