Senat saılaýyna sheteldik 54 baıqaýshy akkredıtteldi
ASTANA. QazAqparat - 2017 jylǵy 14 maýsymda Ortalyq saılaý komıssııasy «2017 jylǵy 28 maýsymǵa taǵaıyndalǵan Qazaqstan Respýblıkasy Parlamenti Senatynyń depýtattaryn saılaýǵa halyqaralyq uıym men shet memleketterdiń baıqaýshylaryn akkredıtteý týraly» qaýly qabyldady, dep habarlaıdy QR OSK-nyń baspasóz qyzmeti.
Atalǵan qaýlyǵa sáıkes Ortsaılaýkom Qazaqstan Respýblıkasy Syrtqy ister mınıstrliginiń usynýy boıynsha TMD-dan baıqaýshylar mıssııasynyń quramynda 40 baıqaýshyny, shetmemleketterden - 14 baıqaýshyny akkredıttedi.
Sonymen qatar Qazaqstan Respýblıkasy Syrtqy ister mınıstrligi 2017 jylǵy 1 maýsymdaǵy jaǵdaı boıynsha 15 shet memleketten, sondaı-aq saılaýdy baıqaýǵa qatysa alatyn sheteldik BAQ-tardyń 116 ókilin akkredıttedi.
Shet memleketter men halyqaralyq uıymdardyń baıqaýshylaryn akkredıtteýdi Ortsaılaýkom 2017 jylǵy 22 maýsymǵa deıin júzege asyrady.
Óziniń sózinde Ortsaılaýkomnyń múshesi M.Sársembaev saılaýdyń janama bolǵanyna qaramastan, saılaý naýqanyna degen qyzyǵýshylyqtyń joǵary ekenin atap kórsetti. Akkredıtteý protsesi jalǵasyp jatyr.
