Senat saılaýyna arnalǵan bıýlletender ázirlenedi
«Saılaý bıýlleteniniń formasy Ortalyq saılaý komıssııasynyń 2016 jylǵy 26 sáýirdegi №33/129 qaýlysymen engizilgen ózgeristerimen Ortsaılaýkomnyń 2014 jylǵy 6 maýsymdaǵy №10/233 qaýlysymen bekitilgen. «Qazaqstan Respýblıkasyndaǵy saılaý týraly» Qazaqstan Respýblıkasy Konstıtýtsııalyq Zańynyń 37-babynyń 2-tarmaǵyna sáıkes, saılaý bıýlletenderi saılaý okrýgindegi saılaýshylardyń jalpy sanynyń 1 paıyzy rezervimen saılaý okrýgindegi saılaýshylar sanyna teń mólsherde daıyndalady», - dedi QR OSK hatshysy Sabıla Mustafına QR Ortalyq saılaý komıssııasynyń otyrysynda.
Osyǵan baılanysty «2020 jyly 12 tamyzǵa taǵaıyndalǵan Qazaqstan Respýblıkasy Parlamenti Senaty depýtattarynyń saılaýyna saılaý bıýlletenderin daıyndaý týraly» qaýly qabyldandy. Qaýlyǵa sáıkes oblystyq, Nur-Sultan, Almaty jáne Shymkent qalalarynyń saılaý komıssııalaryna tıisti ákimshilik-aýmaqtyq birliktiń saılaýshylar sanyna sáıkes saılaý bıýlletenderin daıyndaý tapsyryldy.
Budan buryn habarlanǵandaı, búgin QR Ortalyq saılaý komıssııasynyń otyrysynda Parlament Senaty depýtattyǵyna kandıdattardy tirkeý kezeńiniń qorytyndylary qaraldy.
2020 jylǵy 24 shildedegi jaǵdaı boıynsha elimizde Senat depýtattyǵyna saılaý komıssııalary 58 kandıdatty tirkedi. Ortasha alǵanda bir orynǵa úsh úmitker bar.
Aıta keteıik, 2014 jyly saılanǵan Senat depýtattarynyń ókilettik merzimi osy jyldyń qazan aıynda aıaqtalady. Osylaısha, 2020 jyldyń 12 tamyzynda elimizdiń joǵary zań shyǵarýshy organy joǵary palatasyna 17 óńirden bir-bir depýtattan saılanýy qajet.
