Senat saılaýy: halyqaralyq uıymnan baıqaýshylardy akkredıtteý qaraldy - OSK
NUR-SULTAN. QazAqparat – Búgin QR Ortalyq saılaý komıssııasynyń otyrysynda 2020 jylǵy 12 tamyzǵa taǵaıyndalǵan QR Parlamenti Senaty depýtattarynyń saılaýyna halyqaralyq uıymnan baıqaýshylardy akkredıtteý taqyryby qaraldy, dep habarlaıdy QazAqparat tilshisi.
QR OSK tóraǵasy Berik Imashev aǵymdaǵy jyldyń 24 shildesinde Ortalyq saılaý komıssııasynyń qaýlysy negizinde halyqaralyq baıqaý ınstıtýty ashylǵanyn eske saldy.
Óz kezeginde Ortsaılaýkom múshesi Anastasııa Şegortsova Senat depýtattarynyń saılaýyna halyqaralyq uıymnan baıqaýshylardy akkredıtteý týraly baıandama jasady.
«Qazaqstan Respýblıkasyndaǵy Saılaý týraly» Konstıtýtsııalyq Zańnyń 20-2-babyna sáıkes, shet memleketterdiń, halyqaralyq uıymdardyń baıqaýshylaryn akkredıtteýdi Syrtqy ister mınıstrliginiń usynýy boıynsha Ortalyq saılaý komıssııasy júzege asyrady. 2020 jylǵy 6 tamyzda Syrtqy ister mınıstrliginiń usynysy boıynsha Túrkitildes memleketterdiń yntymaqtastyq keńesinen 5 baıqaýshy akkredıtteýge shyǵaryldy. Osy oraıda Ázerbaıjan Elshiliginiń 2 ókili jáne Qyrǵyzstan, Ózbekstan, Túrkııa elshilikterinen bir ókilden bar», - dedi Anastasııa Şegortsova.
Aıta keteıik, saılaý zańnamasyna sáıkes, 6 tamyzda saǵat 18:00-de halyqaralyq baıqaýshylardy akkredıtteý aıaqtaldy.
Eske salsaq, 2014 jyly saılanǵan Senat depýtattarynyń ókilettik merzimi osy jyldyń qazan aıynda aıaqtalady. Osylaısha, 2020 jyldyń 12 tamyzynda elimizdiń joǵary zań shyǵarýshy organy joǵary palatasyna 17 óńirden bir-bir depýtattan saılanýy qajet.
2020 jylǵy 24 shildedegi jaǵdaı boıynsha elimizde Senat depýtattyǵyna saılaý komıssııalary 58 kandıdatty tirkedi. Ortasha alǵanda bir orynǵa úsh úmitkerden bolyp otyr.
