Senat saılaýy balama negizde ótti - TMD baıqaýshylary

ASTANA. QazAqparat - QR Parlamenti Senaty depýtattaryn saılaý balama negizde ótti. Bul týraly búgin QR Ortalyq saılaý komıssııasy ǵımaratynda ótken brıfıngte Táýelsiz Memleketter Dostastyǵy baıqaýshylar mıssııasynyń jetekshisi Sergeı Lebedev aıtty.

«Biz Qazaqstan Respýblıkasynyń barlyq óńirlerinde ótken saılaýǵa daıyndyq barysyn jáne onyń ótýin jiti baqyladyq. Daıyndyq sharalaryn uıymdastyrý deńgeıiniń joǵarylyǵyn, OSK men oblystyq saılaý komıssııalary jumysynyń naqtylyǵyn aıryqsha atap ótkim keledi», - dedi ol.

Onyń atap ótýinshe, barlyq kandıdattar óz baǵdarlamalaryn tanystyrýǵa, qoǵam ókilderimen kezdesýge jáne buqaralyq aqparat quraldarynda málimdeme jasaýǵa jan-jaqty múmkindik alǵan.

«Saılaýdyń balama negizde ótkendigi qýantady. Barlyq jerde Senat depýtatynyń 1 ornyna 2-3 kandıdattan úmitker boldy», - dedi ol.