Senat saılaýy aldyndaǵy kandıdattardyń úgiti búgin aıaqtalady
ASTANA. QazAqparat - 1 qazanda ótetin QR Parlamenti Senatynyń depýtattaryn saılaýyna qatysty kandıdattardyń úgit-nasıhat naýqany búgin, 29 qyrkúıekte 24.00 saǵatta aıaqtalady. Bul týraly QR Ortalyq saılaý komıssııasynyń hatshysy Baqyt Meldeshov málim etti.
Onyń aıtýynsha, 2014 jyldyń 30 qyrkúıeginde, sonymen qatar, daýys beretin kún - 1 qazanda kez kelgen saılaý aldyndaǵy úgitke tyıym salynady.
«Úgit naýqanynyń sheńberinde Senat depýtattyǵyna kandıattardyń tańdaýshylarmen kezdesýler ótkizý kestelerine sáıkes, 11-29 qyrkúıek aralyǵynda 266 kezdesý ótti. 48 respýblıkalyq jáne 150 óńirlik basylymda, 16 respýblıkalyq jáne 30 óńirlik telearnalarǵa, sonymen qatar, 7 aqparat agenttikter men 108 tanymal qoǵamdyq-saıası ınternet-resýrstaryna monıtorıng júrgizildi. Soǵan sáıkes, 1 tamyz ben 28 qyrkúıek aralyǵynda BAQ-ta saılaý naýqanyna arnalǵan 900-den astam materıal jaryq kórdi», - deıdi B. Meldeshov. Munyń 256-sy elektrondyq BAQ-ta, 150-i baspa jáne 495-i ınternet jelisinde shyqqan.
«Daýys berýge deıingi bes kún boıy jáne daýys berý kúni qoǵamdyq pikirdi suraý nátıjelerin, saılaý qorytyndylarynyń boljamdaryn, saılaýǵa baılanysty basqa da zertteýlerdi BAQ-ta jarııalaýǵa ruqsat etilmeıdi», - dep eske saldy OSK hatshysy.
