Senat sarqylatyn ken oryndaryna ınvestıtsııa tartýdy yntalandyratyn zańdy maquldady
Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine jer qoınaýyn paıdalaný jáne ekologııa máseleleri boıynsha ózgerister men tolyqtyrýlar engizý týraly» zańy birinshi oqylymda maquldandy, dep habarlaıdy Kazinform.
Zańnyń maqsaty – jer qoınaýyn paıdalaný salasyndaǵy zańnamany jetildirý.
Senattyń Ekonomıkalyq saıasat, ınnovatsııalyq damý jáne kásipkerlik komıtetiniń málimetinshe, bul qujatta kómirsýtekterdi geologııalyq barlaýdyń ınvestıtsııalyq tartymdylyǵyn arttyrý, bazalyq jobalaý qujattaryna memlekettik saraptama júrgizý tártibin jetildirý eskerilgen. Sonymen qatar zań aıasynda jer qoınaýyn paıdalaný jónindegi operatsııalardy júrgizý kezinde ákimshilik shyǵyndardy qysqartý jónindegi túzetýler, qoldanystaǵy olqylyqtardy joıý jáne kelisimshartty uzartý, jer qoınaýy ýchaskesin keńeıtý rásimderin jaqsartý qarastyrylǵan.
Atap aıtqanda, qujatta sarqylatyn ken oryndaryna ınvestıtsııa tartýdy yntalandyrý qadamdary qamtylǵan.
Zańda Jer qoınaýy jáne jer qoınaýyn paıdalaný týraly kodekske mynadaı túzetýler eskerilgen:
- barlaý kezeńindegi jobalaý qujattary úshin habarlama jasaý tártibi qarastyrylǵan, bul bazalyq jobalaý qujattaryna memlekettik saraptama merzimin 6 aıǵa deıin qysqartýǵa múmkindik beredi.
- bazalyq jobalaý qujattaryn saraptaý tártibin qaıta qaraý, bul kelisý kezeńin 8 aıǵa qysqartady.
- kómirsýtekter salasyndaǵy aýktsıondyq rásimderdi jetildirý, bul elektrondyq aýktsıondardy ótkizý kezinde básekelestikti kúsheıtýge múmkindik beredi.
- barlaý kezeńin uzartýǵa qosymsha múmkindik beredi. Bul barlanǵan jer qoınaýy ýchaskelerin ónerkásiptik aınalymǵa tartý merzimin 3 jylǵa deıin qysqartýǵa yqpal etedi.
- barlaý kezeńin uzartý týraly ótinish berý merzimi sozylady, bul barlaý jumystaryn, onyń ishinde tabylǵan ken ornyn baǵalaý boıynsha jumystardy jalǵastyrýǵa múmkindik beredi.
- taýsylatyn ken oryndarynda óndirýdi qoldaý jáne basqalar.
«Budan basqa, Ekologııalyq kodekske Ulttyq poshta operatorynda jer qoınaýyn paıdalaný saldaryn joıý úshin aqshany saqtaý múmkindigi bóliginde túzetýler engiziledi. Bul memleket pen jer qoınaýyn paıdalanýshy úshin ekinshi deńgeıdegi banktiń defoltynan nemese taratylýynan banktik salymnyń joǵaltý qaýpin azaıtady, sondaı-aq ulttyq kompanııanyń kiristiligin arttyrýǵa múmkindik beredi», - delingen Senat komıtetiniń aqparatynda.
