Senat salyq salýdy jetildirýge arnalǵan jobany birinshi oqylymda maquldady
ASTANA. Qazannyń 22-si. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda palata depýtattary «QR keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» Zań jobasyn birinshi oqylymda maquldady,
dep habarlaıdy QazAqparat.
Atalǵan zań jobasy elimizdiń salyq salý salasyndaǵy zańnamany jetildirý maqsatynda ázirlengen. Sonymen birge qujatta salyq salý stavkalaryn ózgertýge, tájirıbede qoldanylyp otyrǵan erejelerdi naqtylaýǵa baǵyttalǵan sharalar qamtylyp otyr. «Atap aıtqanda, salyq kodeksin ázirleý kezinde shıkizat sektoryna túsetin salyq júktemesin 2009 jyldan bastap ulǵaıtyp, keıinnen saqtaý kózdelgen bolatyn. Degenmen, salyq júktemesiniń deńgeıi jer qoınaýyn paıdalanýshylarǵa salynatyn korporatıvtik tabys salyǵymen jáne paıdaly qazbalardy óndirý salyǵymen retteledi. ıAǵnı, korporatıvtik tabys salyǵy tómendegen jaǵdaıda paıdaly qazbalardy óndirýge qatysty salynatyn salyq ulǵaıýy tıis edi. Osy turǵydan kelgende biz 2010-2012 jyldar aralyǵynda korporatıvtik tabys salyǵynyń mólsherin 20 paıyzdyq stavka retinde qaldyrǵaly otyrmyz. Endeshe, paıdaly qazbalardy óndirý salyǵy da burynǵy deńgeıde 2010-2012 jyldarǵa deıin jalǵasýy tıis», dedi Ekonomıka jáne bıýdjetti josparlaý mınıstri Baqyt Sultanov.
Mınıstrdiń atap ótkenindeı, zań jobasynda korporatıvti tabys salyǵynyń stavkasyn aldaǵy 3 jylda 20 paıyz mólsherde uzartý kózdeledi. Sondyqtan da atalǵan kezeńderde bıýdjetke qosymsha 504 mlrd. teńge qarjy túsý boljanyp otyr. «Mundaı qarajat memlekettik áleýmettik baǵdarlamalardy iske asyrý úshin qajet», dedi mınıstr.
